Detaje të reja janë zbardhur nga ngjarja e ndodhur mbrëmjen e kaluar në Palasë, ku është qëlluar me armë zjarri nga një jaht.
Një nga personat që ndodhej në mjetin lundrues ishte Bruno Çela, 31 vjeç, i cili pas ngjarjes u shoqërua nga policia dhe u mor në pyetje në kuadër të hetimeve.
Çela është anëtar i Këshillit Bashkiak të Tiranës, i zgjedhur në zgjedhjet vendore të vitit 2023 nga radhët e Partisë Socialdemokrate të drejtuar nga Tom Doshi.
Ai është gjithashtu djali i pronarit të kompanisë “Brunes” dhe dhëndër i Tom Doshit.
Sipas burimeve, në bordin e jahtit ndodheshin edhe Leonard Haso, 31 vjeç, Afrim Kastrati, 49 vjeç, si dhe Pashk Gjini, 60 vjeç. Të tre janë shoqëruar dhe janë pyetur nga policia për rrethanat e ngjarjes.
Pashk Gjini rezulton pronar i kompanisë “Alesio 2014”, e cila është vendosur nën sekuestro nga SPAK.
Burime pranë grupit hetimor bëjnë me dije se po verifikohet dinamika e plotë e incidentit, personat që kanë qëlluar, motivet dhe roli i secilit prej personave që ndodheshin në jaht në momentin kur u hap zjarr.
Pas të shtënave, jahti dyshohet se është larguar nga zona dhe ka tentuar t’i shmanget kontrollit të policisë.
Mjeti lundrues është lokalizuar dhe ndaluar rreth dy orë më vonë.
Deri tani nuk ka një njoftim zyrtar për persona të arrestuar, ndërsa hetimet për identifikimin e autorëve dhe zbardhjen e plotë të ngjarjes vijojnë. /skyweb.al
