Aeroporti i Stambollit vijon të mbajë vendin e parë në Europë për numrin e fluturimeve tregtare. Në shtatë muajt e parë të vitit 2026, nga aeroporti kryesor i Stambollit u realizuan 306,595 fluturime, sipas të dhënave të Eurostat, të mbështetura në statistikat e Eurocontrol dhe të përpunuara nga Monitor.
Pas Stambollit renditet aeroporti Charles de Gaulle në Paris me 273,728 fluturime, Heathroë në Londër me 271,870, Schiphol në Amsterdam me 271,418 dhe Madrid-Barajas me 255,607 fluturime.
Në dhjetëshen e parë hyjnë gjithashtu Frankfurti me 250,150 fluturime, Barcelona me 211,898, Roma Fiumicino me 185,519, Mynihu me 173,615 dhe Athina me 157,672 fluturime gjatë periudhës janar-korrik.
Të dhënat i referohen numrit të fluturimeve tregtare, jo numrit të pasagjerëve.
Rinasi ngjitet me shpejtësi në renditjen europiane
Tirana International Airport regjistroi 44,972 fluturime në shtatë muajt e parë të vitit 2026, duke u renditur në vendin e 61-të në Europë.
Rritja gjatë viteve të fundit ka qenë e shpejtë. Në të njëjtën periudhë të vitit 2022, Rinasi kishte vetëm 20,283 fluturime. Numri u rrit në 25,663 në 2023 dhe më pas në 38,587 në 2024. Në shtatëmujorin e vitit 2025 numri mbeti thuajse i pandryshuar, në 38,575, për t’u rritur sërish me 16.6% në 2026.
Krahasuar me shtatëmujorin e vitit 2022, numri i fluturimeve në Rinas është rritur me rreth 122%, pra është më shumë se dyfishuar brenda katër vitesh.
Zgjerimi i aktivitetit e ka ngritur ndjeshëm aeroportin edhe në klasifikimin europian. Rinasi ishte rreth vendit të 97-të në vitin 2022, u ngjit në të 91-in në 2023 dhe në të 70-in në 2024. Pas një pozicioni pothuajse të pandryshuar në 2025, në shtatëmujorin e këtij viti ka avancuar në vendin e 61-të.
Tirana e dyta në Ballkanin Perëndimor, po i afrohet Beogradit
Në Ballkanin Perëndimor, aeroporti me numrin më të madh të fluturimeve mbetet Nikola Tesla i Beogradit, me 50,280 fluturime në shtatë muajt e parë të vitit. Tirana vjen menjëherë pas tij me 44,972 fluturime.
Megjithatë, diferenca mes dy aeroporteve është ngushtuar ndjeshëm. Në vitin 2022, Beogradi regjistronte 33,067 fluturime në shtatë muaj, kundrejt 20,283 të Tiranës. Deri në vitin 2026, fluturimet në Beograd janë rritur me rreth 52%, ndërsa në Tiranë me rreth 122%.
Në vitin 2022, Tirana kishte vetëm rreth 61% të numrit të fluturimeve të Beogradit. Në 2026, raporti ka arritur në afro 89%.
Rinasi ka kaluar ndërkohë edhe disa aeroporte të rëndësishme të rajonit. Aeroporti i Sofjes kishte 37,456 fluturime në shtatëmujorin 2026, Selaniku 34,685 dhe Zagrebi 27,571.
Më poshtë renditen Spliti me 16,535 fluturime, Shkupi me 14,405, Dubrovniku me 14,233, Sarajeva me 9,978 dhe Podgorica me 9,809. Për aeroportin e Prishtinës nuk ka të dhëna në databazën e përdorur të Eurostat.
Edhe ritmi i rritjes gjatë këtij viti është ndër më të lartët në rajon. Fluturimet në Tiranë u shtuan me 16.6% krahasuar me janar-korrikun 2025, ndërsa Podgorica u rrit me 15.8%, Shkupi me 8.7% dhe Beogradi me 3.5%. Në të njëjtën periudhë, Zagrebi shënoi rënie me 2.7% dhe Sarajeva me 4.5%. /Monitor
