Aeroporti i Vlorës në ngërç nga konflikti mes ortakëve, ministria u lë 30 ditë afat kompanive: Kanë nisur penalitetet
Ministri i Energjisë dhe Infrastrukturës, Enena Karakaçi, ka deklaruar se aeroporti i Vlorës do të ndërtohet dhe do të jetë operacional, pavarësisht mosmarrëveshjes tregtare mes dy ortakëve të përfshirë në projekt.
Gjatë një deklarate për mediat, Karakaçi tha se problemi lidhet me një konflikt mes kompanive që janë ofruar vetë për të ndërtuar aeroportin. Sipas tij, kjo mosmarrëveshje ka krijuar një imazh negativ për projektin.
“Aeroporti i Vlorës ka një mosmarrëveshje tregtare mes dy ortakëve. Ata janë ofruar vetë për të ndërtuar projektin. Ka një mosmarrëveshje tregtare që ka dhënë një imazh negativ sa i përket aeroportit”, tha Karakaçi.
Ministri bëri të ditur se institucioni që ai drejton u ka dërguar së fundmi një shkresë kompanive kontraktore, duke u kërkuar zgjidhjen e konfliktit mes tyre. Ai tha se ministria u ka lënë një afat 30 ditor për të mbyllur mosmarrëveshjen.
“Ministria ka qenë e kujdesshme, por i kam dërguar një shkresë së fundmi ku i kam kërkuar që mosmarrëveshjet tregtare të zgjidhen. Kemi lënë një afat 30 ditor që të zgjidhet mosmarrëveshja për aeroportin e Vlorës. Jemi ofruar që të negociojmë edhe ne si qeveri”, u shpreh ministri.
Karakaçi tha se punimet në aeroport kanë ecur mirë, por theksoi se do të merren masa që projekti të përfundojë sa më shpejt, sipas afateve që vetë kompanitë kanë vendosur.
Ai paralajmëroi gjithashtu se çdo ditë vonesë shoqërohet me penalitete dhe se faturat e para të penaliteteve tashmë janë lëshuar.
“Aeroporti ka ecur mirë sa i përket avancimit të punimeve. Do të marrim masat që të përfundojë sa më shpejt sipas afateve që vetë kompanitë kanë vendosur. Çdo ditë vonesë ka penalitete dhe kemi lëshuar faturat e para të penaliteteve”, tha Karakaçi.
Deklarata vjen në një moment kur projekti i aeroportit të Vlorës është përballur me debate për ecurinë e punimeve dhe me paqartësi të shkaktuara nga konflikti tregtar mes ortakëve të përfshirë në ndërtimin e tij.
