Italia ka propozuar vendosjen e një përjashtimi për transaksionet me euro digjitale nën 10 euro, në një masë që do të favorizonte bizneset e vogla, sipas burimeve të konsultuara dhe dokumenteve të siguruara nga Euronews.
Kjo nismë është pritur pozitivisht nga komuniteti bankar qendror, veçanërisht nga Banka Qendrore Evropiane (BQE), tha për Euronews një burim nga sektori bankar.
Euron digjitale është një formë dixhitale pagese që pritet të plotësojë përdorimin e parasë cash. BQE synon të jetë gati për një emetim të mundshëm fillestar në vitin 2029, nëse miratohen këtë vit rregulloret e nevojshme.
Duke qenë se Evropa mbështetet kryesisht te skemat e pagesave me bazë në SHBA, si Visa dhe Mastercard, Bashkimi Evropian po synon një autonomi më të madhe strategjike në fushën e pagesave. Euron digjitale shihet si një nga zgjidhjet e mundshme për arritjen e këtij qëllimi.
Euron digjitale do të ketë statusin e mjetit ligjor të pagesës, që do të thotë se tregtarët, në përgjithësi, do të jenë të detyruar ta pranojnë, me disa përjashtime. Për këtë arsye, ligjvënësit po negociojnë mënyrën se si do të ndahen tarifat mes aktorëve të ndryshëm të tregut, në mënyrë që bizneset e vogla të mos dëmtohen nga përdorimi i monedhës së re dixhitale.
Ndarja e tarifave mes pjesëmarrësve të tregut, e njohur si “modeli i kompensimit”, është ndër çështjet më delikate të negociatave në Bruksel. Një tjetër çështje e rëndësishme janë “kufijtë e mbajtjes”, pra shuma maksimale e euros digjitale që mund të mbahet në një portofol dixhital.
“Propozimi parashikon një kufi për tarifën e shërbimit të tregtarit deri në 0,02 euro për transaksionet me vlerë të ulët, veçanërisht për bizneset e vogla. Por jemi të hapur të shqyrtojmë edhe një tarifë neto zero, pasi, de facto, ky do të ishte rezultati gjithsesi”, tha për Euronews një diplomat i BE-së, në kushte anonimiteti.
“Një zgjidhje e tillë do ta bënte gjithashtu kuadrin më të thjeshtë”, shtoi diplomati.
Sipas dokumenteve të brendshme të siguruara nga Euronews lidhur me negociatat, skema e tarifave do të jetë e përkohshme, duke i dhënë BQE-së mundësinë të mbledhë të dhëna të mjaftueshme përpara se të propozojë një model të ri, nëse do të jetë e nevojshme.
Nevoja për të dhëna më të mira mbi tarifat e pagesave është theksuar edhe nga Gjykata Evropiane e Audituesve. Në një raport të vitit 2025, kjo gjykatë konstatoi se Komisioni Evropian nuk kishte të dhëna të mjaftueshme mbi tarifat dhe kostot e shërbimeve për tregtarët për të monitoruar në mënyrë efektive ndikimin e ndërhyrjeve ekzistuese në çmimet e tregut të pagesave.
Dokumente të tjera të negociatave tregojnë se bizneset e vogla zakonisht paguajnë tarifa më të larta se kompanitë e mëdha, pasi kanë më pak fuqi negociuese me skemat ndërkombëtare të pagesave.
Këto skema janë të vështira për t’u refuzuar nga tregtarët, veçanërisht kur përdoren gjerësisht nga konsumatorët. Sipas një analize të BQE-së, bizneset e vogla mund të paguajnë tre deri në katër herë më shumë tarifa sesa bizneset e mëdha.
Çështja do të shqyrtohet nga shtetet anëtare, Parlamenti Evropian dhe Komisioni Evropian gjatë raundit të ardhshëm të negociatave në Bruksel, sipas një dokumenti të brendshëm të parë nga Euronews.
Negociatorët do të takohen sërish në Bruksel të enjten, 10 shtator, për të vijuar diskutimet.
