Lojërat e reja për PlayStation nuk do të dalin më në disqe duke filluar nga janari i vitit 2028, ka njoftuar gjiganti i industrisë së lojërave.
Sony tha në një postim në blogun e saj se lojërat e reja do të vazhdojnë të shiten në dyqane, por ato do të përmbajnë vetëm një kod dixhital për shkarkim.
Ky njoftim vjen vetëm pak ditë pasi Rockstar bëri të ditur se edhe loja shumë epritur Grand Theft Auto VI (GTA VI) do të lançohet pa një disk fizik.
Ky është një moment i rëndësishëm për industrinë e videolojërave, e cila vitet e fundit është mbështetur gjithnjë e më shumë te shpërndarja dixhitale.
Sony tha se ky vendim erdhi “ndërsa preferencat e konsumatorëve dhe industria më e gjerë e argëtimit vazhdojnë të largohen nga disqet fizike dhe të orientohen drejt përmbajtjes dixhitale”.
“Kjo është një rrugë natyrore për Sony Interactive Entertainment, për t’iu përshtatur prirjeve të konsumatorëve, pasi preferenca e përgjithshme për mediat dixhitale tashmë e tejkalon ndjeshëm atë për disqet fizike,” shtoi kompania.
Megjithatë, vendimi është pritur me kritika në internet. Gazetarja e videolojërave, Vikki Blake, e quajti atë “një goditje të rëndë ndaj të drejtave të konsumatorëve”.
“Ajo paraqet një shqetësim të madh për ruajtjen e videolojërave si pjesë e trashëgimisë kulturore dhe është një problem serioz për lojtarët me të ardhura më të kufizuara, të cilët mbështeten te shkëmbimi i lojërave të përdorura ose huazimi i tyre nga miqtë për të përballuar çmimet e larta të lojërave AAA,” tha kompania. /skyweb.al
