Shqipëria po intensifikon hapat drejt modernizimit të sistemeve të pagesave, një proces që po konsiderohet sfidë strategjike për zhvillimin e ekonomisë. Në Konferencën Ndërkombëtare për Ekonominë, Biznesin, Inovacionin dhe Teknologjinë ICEBIT 2025, Guvernatori i Bankës së Shqipërisë theksoi se transformimi digjital po ndryshon mënyrën se si funksionon sistemi financiar dhe po krijon bazat për një treg më konkurrues.
Një nga zhvillimet më të rëndësishme ishte integrimi i Shqipërisë në Tregun Unik të Pagesave në Euro, SEPA, që i jep vendit një hap të rëndësishëm drejt standardeve evropiane.
Paralelisht, po zhvillohen projekte të tjera që synojnë të modernizojnë infrastrukturën e pagesave.
“Po punojmë me partnerët ndërkombëtarë për modernizimin e sistemeve të pagesave brenda vendit, për të mundësuar pagesa të menjëhershme dhe të sigurta 24/7. Synimi është të rrisim përdorimin e pagesave elektronike, të ulim përdorimin e parasë fizike dhe të nxisim konkurrencën në tregun financiar”, deklaroi Guvernatori Gent Sejko.
Ai nënvizoi se inovacioni shtrihet përtej produkteve të pagesave dhe po ndikon mënyrën se si hartohet politika monetare, si vlerësohen rreziqet dhe si përmirësohet transparenca. BSH tashmë po përdor modele të avancuara për parashikimin e inflacionit, analiza të të dhënave për monitorimin e stabilitetit financiar, si edhe procese të digjitalizuara për mbledhjen e statistikave.
Sipas Sejkos, vendet që përballen me ritme të shpejta transformimi teknologjik duhet të ndërthurin dijen, inovacionin, teknologjinë dhe zhvillimin e kapitalit njerëzor me politikat publike, në mënyrë që të mbështesin një ekonomi më të qëndrueshme dhe më konkurruese. /skyweb.al
