Ministrat e Jashtëm të Bashkimit Europian, të mbledhur në Bruksel, nuk kanë mbështetur zgjerimin e misionit detar europian në Ngushticën e Hormuzit, pavarësisht presionit të shtuar nga Shtetet e Bashkuara për të garantuar sigurinë e këtij korridori strategjik të naftës.
Shefja e politikës së jashtme të BE-së, Kaja Kallas, deklaroi se vendet anëtare nuk kanë shfaqur gatishmëri për të zgjeruar mandatin e misionit detar “Aspides” drejt Hormuzit, edhe pse ka diskutime për forcimin e kapaciteteve të tij.
Sipas saj, ministrat ranë dakord se operacioni duhet të përforcohet pasi aktualisht ka pak mjete detare në dispozicion, por nuk ka mbështetje për një përfshirje më të thellë në zonën ku po përshkallëzohet konflikti.
“Diskutuam që misioni duhet të forcohet sepse nuk ka shumë mjete detare. Por për zgjerimin e mandatit për të mbuluar Ngushticën e Hormuzit nuk pati gatishmëri nga shtetet anëtare. Askush nuk dëshiron të hyjë aktivisht në këtë luftë”, u shpreh Kallas.
Takimi i ministrave të jashtëm u zhvillua një ditë pasi presidenti amerikan Donald Trump paralajmëroi se NATO mund të përballet me një “të ardhme shumë të keqe” nëse aleatët nuk ndihmojnë SHBA për të mbrojtur lundrimin në Ngushticën e Hormuzit.
Konflikti me Iranin ka shkaktuar një nga goditjet më të mëdha në furnizimin global me naftë, duke çuar çmimet mbi 100 dollarë për fuçi dhe duke rritur shqetësimet për stabilitetin e tregjeve energjetike.
Misioni europian “Aspides”, i krijuar në shkurt të vitit 2024, është një operacion mbrojtës që synon të mbrojë anijet tregtare dhe lirinë e lundrimit pas sulmeve të përsëritura ndaj transportit detar nga rebelët Houthi të mbështetur nga Irani.
Operacioni monitoron një zonë të gjerë që përfshin Detin e Kuq, Gjirin e Adenit, Detin Arabik, Gjirin e Omanit, Gjirin Persik dhe Ngushticën e Hormuzit.
Megjithatë, kërkesa e fundit e Uashingtonit nuk ka gjetur mbështetje të gjerë në Europë. Para takimit, ministri i Jashtëm i Gjermanisë përjashtoi pjesëmarrjen e vendit të tij në këtë operacion, ndërsa Rumania theksoi se duhet të përqendrohet në kapacitetet detare në Detin e Zi.
Edhe Luksemburgu shprehu rezerva për përfshirjen ushtarake në rajon. Ministri i Jashtëm Xavier Bettel deklaroi se Bashkimi Europian mund të ofrojë ndihmë përmes satelitëve dhe komunikimeve, por jo me trupa apo mjete ushtarake në terren. /euronews.com
