Banka Qendrore Evropiane bëri një tjetër ulje të normës bazë të interesit me 0.25%, ndërkohë që bota është futur në një pasiguri të madhe për shkak të tarifave që ka paralajmëruar administrate Trump.
Kjo ulje e çon normën bazë të BQE-së në 2.25%. Që prej mesit të vitit 2023 kur norma bazë e interesit të BQE ishte në 4% ajo ka ardhur vazhdimisht në ulje duke shënuar edhe vendimin e fundit.
Zhvillimet lidhur me tarifat gjatë javëve të fundit shihen gjerësisht nga analistët dhe ekonomistët si një nga arsyet kryesore që e kanë shtyrë BQE-në të ulë normat e interesit.
KURSI/ Dollari amerikan zbret në nivelet më të ulta në dekada ndaj lekut
Edhe pse shumë nga tarifat fillestare të vendosura nga SHBA, si dhe masat si kundërpërgjigje janë pezulluar ose lehtësuar, frika për ndikimin e tyre në rritjen ekonomike mbetet e madhe.
Në deklaratën e saj zyrtare, BQE tha se “perspektiva për rritjen ekonomike është përkeqësuar për shkak të tensioneve në rritje.”
Ajo shtoi: “Pasiguria e shtuar ka gjasa të ulë besimin e familjeve dhe bizneseve, dhe reagimi negativ e i paqëndrueshëm i tregjeve ndaj tensioneve tregtare ka gjasa të sjellë shtrëngim të kushteve të financimit.”
A do të vijojë zhvlerësimi i euros ndaj lekut ?
Ulja e normës bazë të interesit nga Banka Qendrore Evropiane teorikisht pritet të ndikojë edhe në kursin e këmbimit të euros ndaj lekut në Shqipëri. Normat e ulta të interesit të depozitave në euro do të ulin interesin e investitorëve ndaj kësaj monedhe si edhe pritshmëritë për rënie të normave të interesit për kreditë, pritet të rrisë sasinë e euros në treg, realitet i cili shoqëruar edhe me flukset hyrëse të euros për shkak të sezonit turistik, pastrimit të parave dhe fushatës, pritet të shkaktojë një dobësim të mëtejshëm të euros ndaj lekut.
Çfarë ndodh me kreditë në euro në Shqipëri
Ulja e normës bazë të interesit nga Banka Qendrore Evropiane pritet të ketë efekt zbutës në kostot e kredive në euro, për individët dhe bizneset që kanë huamarrje në këtë monedhë.
Konkretisht:
- Kreditë ekzistuese me interes të luhatshëm në euro mund të bëhen më të lira, pasi bankat do të reflektojnë uljen e normës bazë në normat e tyre të referencës (p.sh. EURIBOR). Kjo do të ulë këstet mujore për shumë huamarrës.
- Kreditë e reja në euro do të ofrohen me kushte më të favorshme, pra me interesa më të ulëta, duke i bërë ato më tërheqëse për investime, sidomos për sektorin privat.
- Refinancimi i kredive ekzistuese mund të bëhet më interesant, pasi klientët do të përpiqen të përfitojnë nga normat më të ulëta për të zëvendësuar kredi me kosto më të lartë.
Megjithatë, ndikimi konkret në tregun shqiptar varet edhe nga qëndrimi i bankave tregtare, konkurrenca mes tyre, marzhet që ato aplikojnë mbi normat bazë, si dhe situata e përgjithshme ekonomike në vend në një treg të paparashikueshëm si i yni. /skyweb.al
