Një incident i rëndë është shënuar këtë të martë në ambientet e një zyre elektorale të Partisë Socialdemokrate PSD të Tom Doshit në rrugën “Ali Demi” në Tiranë, ku disa persona kanë bërë sherr sipas policisë, e cila raportoi se u gjetën edhe fishekë
Ngjarja ka ndodhur rreth orës 14:00, ndërsa personat e përfshirë janë larguar menjëherë nga vendi i ngjarjes, duke lënë pas dëme materiale dhe elementë të dyshimtë.
Policia e Tiranës ka reaguar menjëherë pas një telefonate në sallën operative dhe ka mbërritur në vendin e ngjarjes me forca të shumta. Gjatë këqyrjes paraprake, uniformat blu konstatuan xhama të dëmtuar të zyrës elektorale, të dyshuara si pasojë e goditjes me sende të forta dhe sherr si dhe dy fishekë lufte në ambientet e jashtme të zyrës.
Në njoftimin zyrtar, Policia e Tiranës thekson se:
“Rreth orës 14:00, në rrugën ‘Ali Demi’, në ambientet e një zyre elektorale, ka ndodhur një konflikt midis disa shtetasve. Gjatë këqyrjes së vendit të ngjarjes u konstatua dëmtim i xhamit të zyrës dhe pranë saj u gjetën dy fishekë luftarakë.”
Sipas autoriteteve, personat e përfshirë në konflikt janë larguar me një automjet dhe aktualisht vijon puna për identifikimin dhe kapjen e tyre. Grupi hetimor, nën drejtimin e Prokurorisë, po punon për zbardhjen e motiveve të ngjarjes dhe dokumentimin e plotë të rrethanave.
Rasti ka ngritur shqetësime për sigurinë gjatë periudhës zgjedhore, ndërsa ende nuk ka një reagim zyrtar nga vetë Partia Socialdemokrate lidhur me incidentin. /skyweb.al
