Drejtoria e Përgjithshme e Policisë së Shtetit ka nisur një tjetër procedurë të klasifikuar në fushën e sigurisë, këtë herë për mirëmbajtjen e qendrës së të dhënave, që përbën zemrën e infrastrukturës digjitale të institucionit.
Fondi i parashikuar për këtë shërbim kap vlerën e afro 1 milion eurove, ndërsa kontrata do të ketë një afat trevjeçar.
Procedura është klasifikuar në nivelin “Sekret”, çka do të thotë se zhvillohet sipas një skeme të ndryshme nga tenderët e zakonshëm publikë, shkruan skyweb.al.
Përzgjedhja e operatorëve do të kalojë fillimisht në fazën e para kualifikimit, ku vlerësohen kapacitetet profesionale dhe kriteret e sigurisë, përpara se kandidatët e përzgjedhur të ftohen për të paraqitur ofertat financiare.
Qendra e të dhënave është infrastruktura ku ruhen dhe menaxhohen databazat policore, sistemet operative dhe informacioni i ndjeshëm i strukturave të rendit.
Mirëmbajtja e saj konsiderohet një shërbim kritik, pasi lidhet drejtpërdrejt me funksionimin e sistemeve të kontrollit, aksesin në të dhëna dhe koordinimin e operacioneve në terren.
Ky është tenderi i dytë me klasifikim “Sekret” që Policia hap brenda një intervali të shkurtër kohor.
Vetëm pak ditë më parë u çel një tjetër procedurë e ngjashme për mirëmbajtjen e sistemit Datacom, rrjeti i brendshëm i komunikimit dhe transmetimit të të dhënave të strukturave policore.
Dy kontratat, të shpallura njëra pas tjetrës, tregojnë për një fokus të shtuar te infrastruktura digjitale dhe siguria e sistemeve të brendshme të institucionit. /skyweb.al
