Centrali bërthamor Beznau në Zvicër mund të pezullojë përkohësisht aktivitetin këtë të premte për shkak të valës së të nxehtit që ka përfshirë vendin, njoftoi operatori i tij, “Axpo”.
Sipas kompanisë, vendimi lidhet me rritjen e temperaturës së lumit Aare, i cili furnizon me ujë sistemin e ftohjes së reaktorëve. Nëse temperatura e lumit mbetet mbi 25 gradë Celsius për tre ditë radhazi, centrali detyrohet të ndërpresë punën për të shmangur ndikimin negativ në florën dhe faunën lokale, pasi uji i përdorur për ftohje rikthehet në lumë disa gradë më i ngrohtë.
Autoritetet kanë bërë të ditur se prodhimi i dy reaktorëve, të cilët janë rreth 55 vjeç, është reduktuar tashmë me 50 për qind që prej së martës.
Megjithatë, “Axpo” thekson se centrali mund të vazhdojë funksionimin vetëm nëse kjo konsiderohet e domosdoshme për garantimin e furnizimit me energji elektrike, ruajtjen e stabilitetit të rrjetit ose për arsye të sigurisë bërthamore.
