Kryeministri Edi Rama ka reaguar me ironi ndaj kërkesave për dorëheqjen e tij, duke lënë të kuptohet se nuk ka ndërmend të largohet nga drejtimi i qeverisë para vitit 2030.
Në një postim në rrjetet sociale, ai publikoi një mesazh që i kërkonte dorëheqjen, ndërsa iu përgjigj me një “manifest” satirik.
Rama renditi një sërë arritjesh që, sipas tij, justifikojnë vijimin e qeverisjes, duke përmendur transformimet urbane e rurale, ndërtimin e aeroporteve, rritjen e turizmit, hapjen e negociatave me Bashkimin Evropian, zhvillimet në ekonomi, rritjen e pagave, si edhe investimet në arsim, shëndetësi dhe infrastrukturë.
Kreu i qeverisë theksoi gjithashtu se sot në Shqipëri protestohet paqësisht, duke e krahasuar situatën me të kaluarën, ndërsa shtoi se vendi gëzon më shumë respekt në arenën ndërkombëtare.
Në fund të postimit, Rama dha edhe mesazhin politik më të fortë, duke shkruar: “Dorëhiqu… në 2030! Nuk do të na duhesh atëherë, por do të kujtojmë me siguri.”
Deklarata interpretohet si një sinjal i qartë se kryeministri synon të qëndrojë në detyrë deri në përmbushjen e objektivit të shpallur për anëtarësimin e Shqipërisë në Bashkimin Evropian në vitin 2030.
