Turkish Airlines ka njoftuar se ka vendosur të shesë gjithë pjesën e saj prej 49 për qind në Air Albania, sipas mediave turke.
Lajmi u publikua nga Sozcu, ku kompania deklaron se bordi ka miratuar shitjen dhe se zhvillime të mëtejshme do t’u komunikohen investitorëve, raporton Skyweb.al.
Air Albania u themelua më 16 maj 2018 si një partneritet mes Shqipërisë dhe Turqisë. Aksioneri kryesor ishte Turkish Airlines me 49.12 për qind, ndërsa pjesa tjetër ndahej mes Albcontrol me rreth 10 për qind dhe MDN Investment me rreth 41 për qind.
Fluturimi i parë i rregullt u krye më 14 shtator 2018 në linjën Tiranë Stamboll.
Në vitin 2023 Air Albania arriti të renditej operatori i dytë më i madh në vend me 7 për qind të tregut. Në vitin 2024 zbriti në vend të tretë me një peshë prej 3.4 për qind, kryesisht për shkak të konkurrencës së Wizz Air dhe Ryanair në destinacionet jashtë Stambollit.
Kompania nuk ka dorëzuar asnjëherë bilanc, por të dhënat e Tatimeve tregojnë një qarkullim prej rreth 3.8 miliardë lekësh në vitin 2021, rreth 5 miliardë lekësh në vitin 2022, 5.5 miliardë lekësh në vitin 2023 dhe rreth 4 miliardë lekësh në vitin 2024. Air Albania ka rezultuar historikisht me humbje. /skyweb.al
