Turistët që kanë qëndruar në struktura akomoduese gjatë muajit nëntor 2025 kanë shënuar rritje të ndjeshme krahasuar me të njëjtin muaj të një viti më parë, duke konfirmuar vijimësinë e prurjeve turistike edhe jashtë sezonit veror.
Të dhënat zyrtare të INSTAT tregojnë se numri i vizitorëve gjithsej u rrit me 30,0%, ku vizitorët jo rezidentë shënuan një rritje prej 31,0%, ndërsa rezidentët u rritën me 28,0%.
Rritje është regjistruar edhe në net-qëndrime, të cilat u shtuan me 29,8% në total.
Net-qëndrimet nga vizitorët jo rezidentë u rritën me 32,5%, ndërsa ato nga rezidentët me 23,0%. Vizitorët e huaj shënuan rritje si në zonat jo bregdetare me 21,6%, ashtu edhe në hotele dhe struktura të ngjashme akomoduese me 29,8%.
Një element që bie në sy gjatë nëntorit është ndryshimi në renditjen e tregjeve kryesore të turizmit hyrës. Italia ka kaluar Kosovën duke u renditur e para për nga numri i vizitorëve jo rezidentë që janë akomoduar në Shqipëri. Sipas INSTAT, 19% e vizitorëve kanë ardhur nga Italia, 18% nga Kosova dhe 9% nga Gjermania. Franca dhe Mbretëria e Bashkuar kanë kontribuar përkatësisht me 6% dhe 5%, ndërsa 43% e vizitorëve kanë ardhur nga vende të tjera.
Norma e shfrytëzimit të dhomave në hotele ka arritur në 22,2%, nga 19,5% që ishte në nëntor 2024, duke reflektuar rritje reale të kërkesës për akomodim.
Viti 2025 u mbyll me mbi 12 milionë shtetas të huaj që hynë në Shqipëri, ndërsa edhe ky vit pritet të ruajë tendencë pozitive, por me ritme më të moderuara rritjeje krahasuar me vitet e mëparshme.
Ngadalësimi i pritshëm lidhet me disa faktorë njëkohësisht, përfshirë rritjen e çmimeve në disa zona turistike, zhvlerësimin e euros që ka ndikuar veçanërisht tregun kosovar, vlerësimet më të ulëta në forume dhe blogje turistike, si dhe prirjen për ulje të shpenzimeve nga vizitorët për shkak të pasigurive gjeopolitike në nivel global. /skyweb.al
