Në mbledhjen e 17 marsit 2026, Këshilli i Ministrave ka miratuar një vendim që përcakton mënyrën e kompensimit për efektivët e Forcave të Armatosura të cilët emërohen ose dërgohen në detyrë jashtë zonës së tyre të banimit.
Vendimi parashikon që ushtarakët aktivë, të cilëve nuk u ofrohet transport, strehim apo mbulim qiraje nga Ministria e Mbrojtjes, të përfitojnë pagesë mujore në varësi të distancës që duhet të përshkojnë:
Për distanca nga 5 deri në 25 kilometra, kompensimi është 4,400 lekë në muaj.
Për 26 deri në 50 kilometra, masa rritet në 8,800 lekë.
Për 51 deri në 100 kilometra, pagesa arrin në 13,200 lekë.
Për distanca mbi 101 kilometra, kompensimi shkon në 20,000 lekë në muaj.
Kompensimi ndërpritet në momentin që ushtaraku rikthehet në vendbanimin e tij, përfundon periudha e komandimit ose i sigurohet banesë pranë vendit të shërbimit.
Vendimi parashikon gjithashtu që, në rastet kur ushtaraku zhvendos familjen, transporti për familjarët dhe për sendet e banesës të realizohet pa kosto, përmes mjeteve të Ministrisë së Mbrojtjes.
Për të përfituar nga kjo skemë, ushtarakët duhet të paraqesin çdo vit dokumentacionin përkatës, ndërsa zbatimi i vendimit i është ngarkuar Ministrisë së Mbrojtjes dhe Shtabit të Përgjithshëm të Forcave të Armatosura. /skyweb.al
