Parlamenti pritet të miratojë projektligjin që parashikon fshirjen, shuarjen dhe reduktimin e detyrimeve tatimore e doganore për bizneset, duke e paraqitur atë si pjesë të paketës fiskale. Ministri i Financave, Petrit Malaj, bëri të ditur më herët para gazetarëve se borxhi total i prapambetur që synohet të pastrohet arrin në rreth 1 miliard euro, duke përfshirë detyrimet e administratës tatimore dhe doganave deri në fund të vitit 2024.
Por nisma ka ndezur debat pikërisht për atë që i mungon më shumë një amnistie fiskale: Transparenca. Një amnisti e besueshme ose paqe fiskale sic1 dëshiron ta quajë Kryeministri, bëhet vetëm një herë dhe shteti jep mesazhin se nuk do të përsëritet, përndryshe, në vend që të legalizojë ekonominë, i jep krahë paligjshmërisë dhe dëmton konkurrencën.
Në këtë rast, qeveria refuzon të publikojë listën e përfituesve, edhe pse falen detyrime të grumbulluara për më shumë se një dekadë.
Projektligji parashikon fshirje të plotë të borxheve të krijuara deri në vitin 2014, si dhe fshirje të pjesshme për detyrimet pas këtij viti, nëse paguhet një pjesë e principalit.
Ekspertët kërkojnë publikimin e listës së përfituesve, sidomos për subjektet që rezultojnë të mbyllura vetëm në letra, ndërkohë që vazhdojnë aktivitet me biznese të tjera. Sipas tyre në këto raste fshirja e borxhit funksionon si shpërblim për shmangien e detyrimeve dhe penalizon bizneset që kanë paguar rregullisht.
Ministria e Financave refuzon publikimin e listës së bizneseve duke u justifikuar me mbrojtjen e të dhënave tatimore.
Kjo mungesë transparence thellon dyshimet se projektligji rrezikon të kthehet në një instrument për të legalizuar praktikisht borxhet e papaguara të viteve të shkuara, pa bërë dallim mes bizneseve të falimentuara realisht dhe atyre që kanë krijuar borxhe ndërkohë që kanë vijuar aktivitetin me struktura të reja.
Pa publikimin e emrave, publiku nuk ka asnjë garanci se falja nuk i shërben një grupi të vogël interesash dhe se nuk po dëmtohet besimi në sistemin fiskal.
Në këtë formë, ajo që qeveria e quan “paqë fiskale” rrezikon të kthehet në një precedent të rrezikshëm: Një sinjal se borxhet e papaguara mund të falen periodikisht, duke i dekurajuar bizneset që zbatojnë rregullat dhe duke përforcuar kulturën e shmangies fiskale. /skyweb.al
