Administrata Tatimore po vijon procesin e faljes së detyrimeve tatimore të papaguara, sipas përcaktimeve të ligjit në fuqi.
Sipas të dhënave zyrtare, deri më tani janë fshirë ose shuar automatikisht 215 milionë euro detyrime tatimore të papaguara për 25,005 tatimpagues, në kuadër të procesit të faljes pa kusht për detyrimet deri më 31 dhjetor 2014.
Administrata Tatimore rikujton se 30 qershori 2026 është afati i fundit për tatimpaguesit që duhet të kryejnë pagesën e detyrimit të nevojshëm për të përfituar nga fshirja e 50% të principalit.
I njëjti afat vlen edhe për dorëzimin e deklaratave të padorëzuara deri më 31 dhjetor 2024, me qëllim përfitimin nga fshirja e gjobave për mosdeklarim në afat.
Ndërkohë, administrata njofton se ka përfunduar me sukses edhe procesin automatik të fshirjes së gjobave tatimore të papaguara për kategoritë e parashikuara në ligj.
Nga ky proces kanë përfituar 105,409 tatimpagues, ndërsa vlera totale e gjobave të fshira ose të shuara arrin në rreth 91.6 milionë euro.
Kjo shumë ndahet në dy kategori kryesore.
Kategoria e parë përfshin 70.5 milionë euro gjoba administrative të vendosura nga inspektorët tatimorë për detyrime të papaguara që lidhen me periudha tatimore deri më 31 dhjetor 2014 dhe me datë kontabilizimi deri më 31 dhjetor 2024.
Nga kjo kategori kanë përfituar 13,667 tatimpagues.
Kategoria e dytë përfshin 21.1 milionë euro gjoba të tjera administrative, përfshirë gjobat për dorëzim të vonuar të deklaratave.
Këto gjoba lidhen me periudha tatimore deri më 31 dhjetor 2024 dhe me datë kontabilizimi deri më 30 qershor 2026, me kusht që deklaratat përkatëse të kenë statusin “e dorëzuar”.
Nga kjo kategori kanë përfituar 96,302 tatimpagues.
Në total, nga dy proceset e raportuara, vlera e detyrimeve dhe gjobave të fshira arrin në rreth 306.6 milionë euro.
Administrata Tatimore sqaron se nga falja nuk përfitojnë tatimpaguesit e dënuar me vendim gjyqësor të formës së prerë, si dhe ata që janë në proces hetimi apo gjykimi për vepra penale në fushën e tatimeve dhe doganave.
Gjithashtu, nuk përfshihen në procesin e fshirjes detyrimet tatimore për të cilat ekziston një vendim gjyqësor i formës së prerë në favor të Administratës Tatimore.
