Korporata e Investimeve Shqiptare ka shpallur për herë të katërt thirrjen për të gjetur një investitor privat që do të ndërtojë kullën e re në truallin e Kadastrës në Tiranë, raporton skyweb.al.
Projekti i njohur si “LIFT Tower” parashikon ndërtimin e një godine gjigante me 40 kate mbi tokë dhe 7 kate nëntokë, ndërsa shteti kërkon që privatët të ofrojnë më shumë se 45 për qind të hapësirës së ndërtimit në favor të tij, si pronar i truallit.
Tentativat e deritanishme nuk kanë sjellë rezultat.
Në thirrjen e parë në nëntor 2024, dy kompani, “EDIL AL IT” dhe “DK Construction ONE Corp”, u kualifikuan për fazën e dytë, por në fund asnjëra nuk paraqiti ofertë konkrete, çka e detyroi Korporatën të anulonte procedurën.
Më pas, në shpalljen e dytë, interes u shfaq nga “EDIL AL IT” dhe “Alko Impex”, por aplikimi i dorëzuar u cilësua i pavlefshëm për shkak të pasaktësive në dokumentacion, duke e çuar sërish procesin në dështim.
Edhe tentativa e tretë, që i la afat subjekteve private deri më 30 maj 2025 për të dorëzuar aplikimet, nuk arriti të prodhonte një fitues.
Megjithatë, Korporata vijon përpjekjet, duke i dhënë një tjetër mundësi investitorëve për të hyrë në garë. Projekti parashikon zhvillimin e truallit pranë rrugës “Muhamet Gjollesha”, me sipërfaqe mbi 2,300 metra katrorë, ku do të ngrihet kulla shumëfunksionale me zyra, ambiente tregtare, parkime, hoteleri, rezidenca studentore dhe hapësira banimi. Investimi, i llogaritur në qindra milionë euro, synon t’i garantojë shtetit rreth 34 mijë metra katrorë hapësira moderne pune për institucionet publike, pa asnjë kontribut financiar nga ana e tij.
Pas tri dështimeve të njëpasnjëshme dhe shpalljes së katërt të thirrjes, mbetet e hapur pyetja nëse ky projekt do të marrë jetë apo nëse epoka e kullave, që ka dominuar zhvillimin urban në vitet e fundit, po i afrohet fundit në Shqipëri. /skyweb.al
