Prokuroria e Tiranës ka finalizuar operacionin policor të koduar “Nënshkrimi”, në qendër të të cilit ndodhet noterja Sanja Telhallari.
Sipas njoftimit zyrtar, janë sekuestruar 18 pasuri me vlerë rreth 3 milionë euro, të dyshuara si të përfituara në mënyrë të paligjshme gjatë ushtrimit të detyrës. Në total bëhet fjalë për 13 prona të paluajtshme dhe 5 llogari bankare.
Hetimi është zhvilluar nga Seksioni për Hetimin e Pastrimit të Parave dhe Aseteve Kriminale, pas një procedimi penal të nisur nga Prokuroria e Tiranës për gjurmimin e aseteve me burime të dyshimta. Vendimi për sekuestron u dha nga Gjykata e Tiranës dhe tashmë është ekzekutuar.
Ndërkohë, hetimet vijojnë me qëllim zbulimin dhe sekuestrimin e pasurive të tjera që mund të lidhen me aktivitetin e noteres, si dhe për të dokumentuar ligjërisht burimin e të ardhurave të saj.
Materialet procedurale i janë referuar Prokurorisë së Tiranës, e cila pritet të ndërmarrë veprime të mëtejshme lidhur me këtë çështje.
Njoftimi i prokurorisë
Tiranë/Finalizohet operacioni policor i koduar “Nënshkrimi”.
Sekuestrohen 18 asete me vlerë 3 milionë euro, me burime të dyshuara kriminale, që dyshohet se i ka përfituar një 35-vjeçare, gjatë kryerjes së detyrës si notere.
Asetet e sekuestruara: 13 pasuri të paluajtshme dhe 5 llogari bankare.
Paralelisht po kryhen veprime hetimore dhe procedurale, për të gjurmuar dhe sekuestruar pasuri të tjera të 35-vjeçares, me burime të dyshimta, si dhe për të dokumentuar me prova ligjore burimin e të ardhurave të kësaj shtetaseje.
Në kuadër të një procedimi penal, të iniciuar në Prokurorinë e Tiranës, me objekt gjurmimin e aseteve kriminale, të dyshuara të përfituara nga shtetasja S. T., 35 vjeçe, banuese në Tiranë, gjatë kryerjes së detyrës si notere, Seksioni për Hetimin e Pastrimit të Parave dhe Aseteve Kriminale finalizoi operacionin “Nënshkrimi”.
Në vijim të veprimeve procedurale, të kryera në kuadër të këtij procedimi, u ekzekutua vendimi i Gjykatës së Tiranës, për ekzekutimin e 18 pasurive të 35-vjeçares, me vlerë 3 milionë euro, konkretisht 13 pasuri të paluajtshme dhe 5 llogari bankare.
Hetimet dhe veprimet operacionale, vijojnë.
Materialet procedurale iu referuan Prokurorisë së Tiranës, për veprime të mëtejshme. /skyweb.al
