Pensionet në Shqipëri do të indeksohen me 2.5 për qind gjatë muajit tetor, sipas llogaritjeve të Institutit të Statistikave mbi Indeksin e Çmimeve të Konsumit të shportës së mallrave dhe shërbimeve për pensionistët.
Ky indeksim, i cili pritet të miratohet nga Këshilli Administrativ i Institutit të Sigurimeve Shoqërore dhe më pas nga Këshilli i Ministrave, do të sjellë një rritje mesatare prej rreth 490 lekësh për pensionet urbane të pleqërisë. Kjo shumë është llogaritur duke marrë si referencë pensionin mesatar urban në fund të vitit 2024, që ishte 19,609 lekë sipas shqiptarja.com.
Për pensionet rurale, shtesa do të jetë më e ulët, me vetëm 296 lekë shtesë mbi pensionin mesatar prej 11,878 lekësh.
Aktualisht në Shqipëri numërohen 721,398 pensionistë, nga të cilët 630 mijë janë me pension pleqërie urban dhe 91 mijë me pension rural.
Indeksimi i këtij viti është dukshëm më i ulët krahasuar me vitin e kaluar, kur rritja ishte 4.1 për qind.
Shkak për këtë diferencë është rënia e inflacionit në krahasim me periudhën 2023-2024.
Në praktikë, pensionistët do të përfitojnë më pak këtë vit, ndërkohë që kostot e jetesës mbeten të larta, sidomos në qytetet kryesore të vendit. /skyweb.al
