Air France dhe Airbus janë shpallur fajtore nga Gjykata e Apelit në Paris për “vrasje nga pakujdesia korporative” lidhur me rrëzimin tragjik të fluturimit AF447 në vitin 2009, ku humbën jetën 228 persona.
Vendimi u dha pas një procesi gjyqësor tetëjavor dhe rrëzon vendimin e një gjykate më të ulët që në vitin 2023 kishte shpallur të pafajshme dy kompanitë franceze.
Gjykata franceze arriti në përfundimin se Air France dhe Airbus ishin “plotësisht dhe tërësisht përgjegjëse” për katastrofën ajrore, e konsideruar si aksidenti më i rëndë në historinë e aviacionit francez.
Fluturimi AF447 i Air France, me avion Airbus A330, u nis më 1 qershor 2009 nga Rio de Janeiro drejt Parisit, por u zhduk nga radarët mbi Oqeanin Atlantik. Të 216 pasagjerët dhe 12 anëtarët e ekuipazhit humbën jetën.
Gjykata urdhëroi Air France dhe Airbus të paguajnë gjobën maksimale prej 225 mijë eurosh secila për përgjegjësinë korporative në aksident.
Sipas vendimit, edhe pse gabimet e pilotëve nuk u përjashtuan, ekuipazhi nuk ishte trajnuar mjaftueshëm për të përballuar një situatë kaq komplekse teknike.
Gjykatësi deklaroi se pilotët “bënë gjithçka që mundën” dhe se nuk mund të fajësohen përtej aftësive që kishin.
Hetimet zbuluan se problemi nisi pasi sensorët e shpejtësisë, të njohur si “pitot probes”, u bllokuan nga kristalet e akullit gjatë fluturimit.
Kjo çoi në çaktivizimin automatik të sistemeve të avionit dhe kalimin e kontrollit te dy bashkëpilotët.
Sipas raportit përfundimtar të autoriteteve franceze të aviacionit, pilotët humbën kontrollin e avionit pasi morën sinjale të gabuara për shpejtësinë.
Në vend që të ulnin hundën e avionit për të rifituar stabilitetin, ata e ngritën atë më lart, duke futur avionin në “stall”, situatë nga e cila nuk arritën të dilnin deri në përplasjen me detin.
Gjykata fajësoi Air France për mungesë të trajnimit adekuat të pilotëve, ndërsa Airbus për nënvlerësimin e problemeve teknike me sensorët e avionit.
Kutia e zezë e avionit u gjet vetëm në vitin 2011, dy vite pas aksidentit, ndërsa hetimet përfundimtare në vitin 2012 arritën në përfundimin se tragjedia u shkaktua nga kombinimi i defekteve teknike dhe reagimeve të gabuara të ekuipazhit.
Në avion ndodheshin pasagjerë nga 33 vende të botës, përfshirë Francën, Brazilin, Gjermaninë, SHBA-në dhe Britaninë.
Vetëm 51 trupa u gjetën gjatë javëve të para të kërkimeve në Atlantik.
Familjarët e viktimave, të cilët kanë ndjekur për afro dy dekada betejën ligjore, e konsideruan gjobën si simbolike dhe kërkojnë dënime më të forta.
Ndërkohë, Air France dhe Airbus kanë bërë të ditur se do ta apelojnë sërish vendimin. /skyweb.al
