Euro po përgatitet të ndryshojë pamje për herë të parë në mënyrë të plotë që prej futjes së saj në qarkullim në vitin 2002.
Banka Qendrore Evropiane ka publikuar propozimet e përzgjedhura për serinë e re të kartëmonedhave dhe ka hapur konsultimin publik, ku qytetarët mund të japin mendimin e tyre deri më 21 shtator 2026.
Por pyetja që lind menjëherë është: çfarë do të ndodhë me kartëmonedhat që përdorim sot?
Sipas BQE-së, kartëmonedhat aktuale euro nuk do të humbasin vlerën e tyre. Ato do të vazhdojnë të përdoren normalisht dhe do të qarkullojnë paralelisht me serinë e re, edhe pas nisjes së emetimit të kartëmonedhave me dizajnin e ri.
Pra, qytetarët nuk do të kenë nevojë t’i ndërrojnë menjëherë paratë që kanë në portofol apo në kursime.
Ndryshimi lidhet kryesisht me pamjen, elementët e sigurisë, jetëgjatësinë dhe qëndrueshmërinë mjedisore të kartëmonedhave të ardhshme.
Në konkursin për dizajnin e ri morën pjesë më shumë se 1,200 dizajnerë grafikë nga vende të ndryshme të Evropës.
Mes propozimeve të përzgjedhura janë figura të njohura si Marie Skłodowska-Curie, Ludwig van Beethoven dhe Leonardo da Vinci.
Një tjetër linjë dizajni është frymëzuar nga natyra evropiane dhe përfshin shpendë dhe motive të biodiversitetit.
BQE synon që përmes serisë së re kartëmonedhat të jenë më rezistente dhe të kenë ndikim më të ulët në mjedis.
Procesi është prezantuar këtë të shtunë edhe në Kosovë, ku euro përdoret si valutë zyrtare. Guvernatori i Bankës Qendrore të Kosovës, Ahmet Ismaili, u bëri thirrje qytetarëve të marrin pjesë në konsultimin publik.
Ai theksoi se procesi ka rëndësi të veçantë për Kosovën, pavarësisht se vendi nuk është ende pjesë e eurozonës.
Sipas tij, afrimi me sistemin financiar evropian po mbështetet edhe përmes modernizimit të pagesave dhe integrimit në SEPA.
Pas përfundimit të konsultimit, BQE do të vijojë me fazat e tjera të përzgjedhjes së dizajnit. Deri atëherë, një gjë është e sigurt: euroja do të ndryshojë fytyrë, por kartëmonedhat e vjetra nuk do të bëhen të pavlefshme. /skyweb.al
