Aksidenti tragjik i 22 korrikut pranë rrethrrotullimit të TEG-ut, ku humbën jetën dy persona dhe një tjetër mbeti i plagosur, ka rikthyer fort debatin për sigurinë e mjeteve të rënda dhe kontrollin e tyre në rrugët e Tiranës.
Në aksident u përfshi një kamion-pompë betoni i kompanisë “Alba Beton”, i cili humbi kontrollin, u përplas me një automjet dhe përfundoi në nivelin e poshtëm të aksit TEG-Elbasan.
Por pas tragjedisë dolën në dritë edhe pikëpyetje të tjera. DPSHTRR sqaroi se drejtuesi i mjetit dhe manovratori nuk rezultonin të pajisur prej saj me dokumentacion shqiptar që certifikonte aftësimin për drejtimin dhe përdorimin e këtij mjeti të rëndë.
Prokuroria po heton tashmë rrethanat e aksidentit, por edhe procedurat që kanë bërë të mundur punësimin dhe ushtrimin e aktivitetit nga persona pa dokumentacionin përkatës shqiptar.
Ngjarja merr edhe më shumë peshë përballë asaj që ndodh çdo ditë në rrugët e kryeqytetit: kamionë, betoniere dhe mjete të tjera të tonazhit të rëndë që shihen duke qarkulluar në orare kur lëvizja e tyre është e kufizuar.
Bashkia e Tiranës ka një urdhër që ndalon hyrjen e mjeteve mbi 3.5 ton në brendësi të Unazës së Mesme dhe të Vogël nga ora 07:00 deri në 20:00. Për mjetet e transportit të mallrave kufizimet nisin që në orën 07:00.
Ndërkohë, gjatë sezonit turistik janë vendosur edhe masa shtesë nga Policia e Shtetit për mjetet mbi 7.5 tonë, me kufizime të premteve pas orës 15:00, si dhe gjatë gjithë ditës të shtunave, të dielave dhe festave zyrtare.
Megjithatë, pamjet në terren tregojnë një realitet tjetër.
Skyweb.al filmoi një ditë më parë, në mesditë, pranë Bashkisë së Tiranës, dy betoniere që lëviznin të pashqetësuara në zemër të kryeqytetit.
View this post on Instagram
Edhe më shqetësues është fakti se në afërsi të tyre ndodhej një automjet policie, por nga pamjet nuk evidentohet asnjë ndërhyrje ndaj mjeteve të rënda.
Raste të ngjashme janë denoncuar vazhdimisht edhe në rrjetet sociale, ku janë publikuar kamionë dhe betoniere të kompanive të ndërtimit që qarkullojnë në zona të ndryshme të Tiranës gjatë ditës.
Në këto kushte lind pyetja: Kush po i toleron mjetet e rënda orar oa orar në mes të Tiranës dhe pse?!
Burime të Skyweb.al ngrenë dyshime se zbatimi i kufizimeve po tolerohet në raste të caktuara në terren për shkaqe që lidhen me përfitime monetare mujore, çështje që kërkon verifikim nga strukturat përgjegjëse.
Pas një aksidenti me dy viktima, ku rezulton se drejtuesit e mjetit s’janë në rregull me “letrat”, kjo nuk është më thjesht çështje trafiku apo respektimi orari, është çështje sigurie publike, që krëkon vëmendje të veçantë. /skyweb.al
