Në një artikull të botuar në të përditshem britanike “Metro”, gazetarja Alice Murphy e rendit Shqipërinë mes destinacioneve më të lira dhe më tërheqëse për pushime verore në Evropë, duke e veçuar si një prej zgjedhjeve më të mira për turistët që kërkojnë çmime të favorshme kundrejt destinacioneve tradicionale si Spanja apo Greqia.
Sipas artikullit, kur njerëzit mendojnë për pushime verore ekonomike me paketa turistike, zakonisht zgjedhin menjëherë Spanjën, Tenerife apo ishujt e mëdhenj grekë.
Megjithatë, disa nga destinacionet me raportin më të mirë cilësi-çmim në Evropë janë vende që ende konsiderohen më pak të prekura nga turizmi masiv.
“Familjet po tregohen shumë më të kujdesshme me shpenzimet këtë vit”, tha Sarah Higgs për “Metro”.
Sipas saj, turistët vazhdojnë të kërkojnë diell, pishina dhe pushime të plota, por duan të kthehen në shtëpi, pa ndjerë nevojën se duhet të marrin një tjetër hua për të përballuar shpenzimet.
Themeluesja e “Sarah’s Travel Adventures” shtoi se po sheh gjithnjë e më shumë pushues që po largohen nga destinacionet standarde turistike, në kërkim të hoteleve më cilësore dhe mundësisë për të qëndruar më gjatë me të njëjtin buxhet.
Për një familje me katër persona që udhëton nga maji deri në tetor, këto vende rezultojnë aktualisht ndër më ekonomiket në Evropë, kur kombinohen kostot e fluturimeve dhe akomodimit.
Për sa i përket Shqipërisë, artikulli thekson se vendi ka përjetuar një rritje të jashtëzakonshme të popullaritetit vitet e fundit.
Sipas Sarah Higgs, plazhet shqiptare janë mahnitëse, veçanërisht në Sarandë dhe Ksamil, ndërsa deti ofron pamje që zakonisht krahasohen me ato të Greqisë, por me çmime dukshëm më të ulëta se shumica e vendeve fqinje.
Ajo shton se Shqipëria është bërë shumë e preferuar nga familjet dhe çiftet që kërkojnë një destinacion më të veçantë se paketat turistike standarde, pa pasur nevojë për shpenzime luksi.
Paketa më e lirë për në Shqipëri përfshin fluturimin dhe shtatë net qëndrimi në “Oxygen Boutique Hotel” në Tiranë, me 316 paund për person përmes agjencisë turistike TUI.
Artikulli vlerëson gjithashtu se Shqipëria ofron një mori atraksionesh turistike: nga muzetë dhe jeta moderne e kryeqytetit, deri te relaksi në rivierën shqiptare.
Në veçanti, theksohet se vendi po tërheq vizitorë jo vetëm falë plazheve mahnitëse, por edhe për eksperiencën autentike që ofron.
Në renditjen e destinacioneve më të mira dhe më ekonomike për pushime në Evropë, Shqipëria renditet mes vendeve si krah Mali i Zi, Turqia, Maqedonia e Veriut, Bullgaria, Rumania dhe Bosnjë- Hercegovina — një tjetër sinjal se Shqipëria po forcon pozitat si një nga destinacionet në rritje të turizmit evropian.
