Kriminaliteti i evidentuar në Shqipëri ka shënuar një tendencë rënëse, por pas shifrave të përgjithshme fshihet një zhvillim tjetër shqetësues: rastet e dhunës në familje po shtohen. Të dhënat e INSTAT tregojnë se gjatë vitit 2024 janë evidentuar 32,653 vepra penale, 3.5% më pak se një vit më parë dhe 2.5% më pak krahasuar me vitin 2022.
Rënia është reflektuar në një sërë kategorish. Vjedhjet, mashtrimet, krimet në fushën e drogës, korrupsioni dhe abuzimi me detyrën rezultojnë me më pak raste të evidentuara se një vit më parë.
Por kjo tendencë nuk është ndjekur nga dhuna në familje.
Policia evidentoi 2,139 raste të dhunës në familje gjatë vitit 2024, nga 1,911 në vitin 2023 dhe 1,887 në vitin 2022.
Në vetëm një vit, rastet janë shtuar me rreth 12%, ndërsa krahasuar me vitin 2022 rritja arrin në mbi 13%. Dhuna në familje përbën tashmë rreth 6.6% të të gjitha veprave penale të evidentuara.
Edhe përndjekja ka ndjekur të njëjtën trajektore. Rastet u rritën nga 158 në vitin 2022 në 196 një vit më pas, për të arritur në 232 gjatë vitit 2024.
Megjithatë, brenda panoramës së dhunës ndaj grave ka edhe një zhvillim pozitiv.
Të dhënat për femicidin, forma më ekstreme e dhunës me bazë gjinore, tregojnë një rënie të ndjeshme gjatë vitit 2024.
INSTAT evidenton 3 raste femicidi në vitin 2024, kundrejt 8 rasteve në 2023 dhe 5 në vitin 2022.
Edhe numri i grave dhe vajzave viktima të vrasjeve me dashje u përgjysmua nga 12 në vitin 2023 në 6 raste gjatë vitit 2024.
Në rënie rezultojnë gjithashtu vrasjet e grave për shkak të marrëdhënieve familjare, nga 8 raste në vitin 2023 në 4 gjatë vitit 2024. INSTAT e cilëson vitin 2024 si vitin me numrin më të ulët të viktimave në këto kategori gjatë periudhës së analizuar.
Pra, panorama është e dyfishtë: ndërsa kriminaliteti në tërësi po shënon rënie dhe rastet më ekstreme të dhunës ndaj grave janë reduktuar, konfliktet dhe dhuna brenda familjes po evidentohen gjithnjë e më shpesh./skyweb.al
