Udhëtarët që kalojnë nëpër Aeroportin Ndërkombëtar të Tiranës, prej muajsh tashmë nuk kanë më nevojë të nxjerrin laptopët apo lëngjet (më pak se 100 ml) nga bagazhet gjatë kontrollit të sigurisë.
Instalimi më herët i skanerëve të rinj me teknologji CT, të prodhuar në Shtetet e Bashkuara, ka sjellë një standard të ri, tepër të avancuar në kontrollin e bagazheve në vend.
Pajisjet e gjeneratës së fundit krijojnë imazhe 3D të përmbajtjes së bagazheve, duke i lejuar operatorët të analizojnë objektet nga çdo kënd pa pasur nevojë për kontrolle shtesë fizike.
Kjo rrit ndjeshëm saktësinë në identifikimin e materialeve të rrezikshme, ndërsa për pasagjerët përkthehet në më pak procedura dhe më shumë shpejtësi në kalimin e udhëtarëve duke bërë që në TIA të përpunohen shpesh një numër rekord pasagjerësh në ditë.
Modernizimi i sigurisë në aeroport e afron Tiranën me standardet e aeroporteve më të avancuara europiane dhe amerikane, duke përmirësuar njëkohësisht eksperiencën e udhëtimit dhe nivelin e sigurisë kufitare.
Sipas konstatimeve të Skyweb.al, një teknologji e tille mungon ende në shumë aeroporte kryesore të vendeve të BE-së.
Ky zhvillim është vlerësuar edhe nga përfaqësues të Shteteve të Bashkuara.
Gjatë një vizite në aeroport, e Ngarkuara me Punë Nancy VanHorn theksoi rëndësinë e përdorimit të teknologjisë amerikane në këtë proces, duke nënvizuar se Grupi Kastrati, i drejtuar nga Shefqet Kastrati, po vendos pajisje kontrolli të prodhuara në SHBA.
Sipas saj, bashkëpunimi me ofrues të besueshëm të teknologjisë amerikane ndihmon kompanitë shqiptare të përmirësojnë sigurinë dhe të përforcojnë sigurinë kufitare.
