Një zjarr i madh përfshiu pasditen e 13 korrikut kodrën në anën veriore të Gjirit të Llamanit, një nga zonat më të frekuentuara të bregdetit të Himarës.
Flakët dogjën një sipërfaqe me shkurre dhe pemë të vogla, në një terren kodrinor e shkëmbor, ku ndërhyrja e zjarrfikësve ishte e vështirë.
Në zonë shkuan zjarrfikëset e Himarës dhe të bashkive fqinje, pasi poshtë kodrës ndodhen disa biznese plazhi, ndërsa në anën tjetër ka hotele dhe banesa private.
Për shkak të temperaturave të larta dhe erës, rreziku kryesor ishte përhapja e flakëve drejt pronave dhe zonave të banuara.
Por pas zjarrit janë ngritur dyshime për atë që mund të ndodhë më tej me këtë territor.
Sipas Vox News, në zonën ku ra zjarri është parashikuar ndërtimi i një resorti të madh turistik, i lidhur me biznesmenin Arben Muçobega.
Dokumentet e cituara nga media tregojnë se në vitin 2025 qeveria ka zbardhur një leje zhvillimi për një sipërfaqe prej 101.200 metrash katrorë në kodrën mbi Llaman.
Bëhet fjalë për një zonë shkëmbore, në pjerrësi drejt detit Jon, e cila deri më sot ka qenë kryesisht e pashfrytëzuar për ndërtime.
Sipas raportimit, projekti ka kaluar disa etapa administrative dhe pritet të pajiset edhe me lejen e ndërtimit.
Për këtë arsye, zjarri ka shtuar dyshimet nëse flakët kanë qenë të rastësishme apo nëse lidhen me interesat për zhvillimin e zonës.
Deri tani nuk ka një konfirmim zyrtar nga autoritetet për shkakun e zjarrit.
Hetimi pritet të sqarojë nëse flakët u shkaktuan nga temperaturat e larta, pakujdesia, apo nga një zjarrvënie e qëllimshme. /skyweb.al
