Drejtuesit e mjeteve që do të udhëtojnë në autostradën Tiranë-Durrës duhet të planifikojnë paraprakisht itinerarin gjatë dy netëve të ardhshme.
Autoriteti Rrugor Shqiptar njoftoi se qarkullimi do të bllokohet përkohësisht në të dyja drejtimet, por në ditë të ndryshme, për shkak të punimeve që po kryhen në kuadër të zgjerimit të superstradës.
Në drejtimin Tiranë-Durrës, qarkullimi do të ndërpritet sot, më 21 shtator, nga ora 23:00 deri në orën 05:00 të mëngjesit.
Trafiku do të devijohet nëpërmjet rampës në drejtim të Rinasit dhe më pas do të vijojë në rrugën dytësore. Automjetet do të rikthehen në superstradë përmes rrugës së Rinasit dhe rampës në drejtim të Durrësit.
Për mjetet e rënda, veçanërisht kamionët, devijimi duhet të nisë që në rrethrrotullimin e “Casa Italia”. Masa synon të shmangë përdorimin dhe dëmtimin e rampës së përkohshme të Rinasit.
Në drejtimin Durrës-Tiranë, autostrada do të bllokohet nesër, më 22 shtator, po nga ora 23:00 deri në orën 05:00.
Trafiku do të devijohet nëpërmjet mbikalimit Kashar-Thumanë dhe do të vijojë në rrugën dytësore në krahun e majtë deri pas mbikalimit të Kasharit. Mjetet do të rikthehen më pas në autostradë në drejtim të Tiranës.
Automjetet që kanë si destinacion Rinasin, Shkodrën ose Kosovën do të orientohen që në mbikalimin e autostradës Kashar-Thumanë për të vijuar drejt itinerarit përkatës.
Bllokimi është i nevojshëm për montimin e trarëve tërthorë në hapësirën e mesit të mbikalimit, në kuadër të projektit “Zgjerimi i Superstradës Tiranë-Durrës, Faza III”.
Gjatë intervaleve të punimeve, qarkullimi do të zhvillohet në rrugët dytësore sipas sinjalistikës së vendosur dhe Planit të Menaxhimit të Trafikut.
ARRSH u kërkon drejtuesve të mjeteve të shmangin sa të jetë e mundur këtë segment gjatë orareve të bllokimit dhe të ndjekin udhëzimet në terren.
