Avionët luftarakë gjermanë mund të pajisen në të ardhmen edhe me armë bërthamore britanike apo franceze. Këtë ide e hodhi të mërkurën kancelari Friedrich Merz, në kuadër të diskutimeve për forcimin e mbrojtjes bërthamore evropiane.
Sipas tij, disa vende evropiane, përfshirë Gjermaninë, po shqyrtojnë alternativa përtej mbështetjes tradicionale te SHBA-ja në fushën e parandalimit bërthamor. Merz bëri të ditur se është në bisedime me partnerë evropianë, veçanërisht me Francën, për ndërtimin e një sistemi të përbashkët parandalues në nivel kontinental.
Ai përjashtoi mundësinë e krijimit të një arsenali bërthamor gjerman, por theksoi se, ashtu siç avionët gjermanë mund të mbajnë armë bërthamore amerikane, një gjë e tillë mund të realizohej edhe me armë britanike apo franceze. Këto komente ai i bëri në podcastin gjerman Machtwechsel.
Për dekada me radhë, siguria e Evropës është mbështetur kryesisht në angazhimin e Uashingtonit dhe në rolin kyç të arsenalit bërthamor amerikan si faktor parandalues. Por rizgjedhja e presidentit amerikan Donald Trump, si dhe deklaratat e tij kritike ndaj aleancës së NATO-s dhe komentet mbi Groenlandën, kanë shtuar pasiguritë për vazhdimësinë e kësaj qasjeje.
Ndërkohë, marrëveshja dypalëshe New START, që kufizonte arsenalet strategjike bërthamore të SHBA-së dhe Rusisë, skadoi në fillim të shkurtit pa përpjekje serioze për rinovim.
Merz kujtoi se Franca ka ofruar më herët përfshirjen e Gjermanisë në kuadrin e saj të parandalimit bërthamor, duke theksuar se një propozim i tillë meriton të shqyrtohet seriozisht në rrethanat aktuale.
Nga ana tjetër, sekretari i përgjithshëm i NATO-s, Mark Rutte, deklaroi në Konferencën e Sigurisë në Mynih se Evropa nuk synon të zëvendësojë ombrellën bërthamore amerikane, por të forcojë arkitekturën ekzistuese të sigurisë.
Aktualisht, avionët e vjetër Tornado të Gjermanisë janë të certifikuar për të mbajtur armë bërthamore amerikane. Ata pritet të zëvendësohen nga 35 avionë luftarakë F-35 Lightning II të porositur nga Gjermania në vitin 2022.
