Qarkullimi i automjeteve në rrugën dytësore Tiranë-Durrës, në segmentin nga Mbikalimi i Kamzës deri te Mbikalimi i Kasharit, do të bllokohet gjatë natës së sotme për shkak të punimeve në infrastrukturën rrugore.
Sipas njoftimit të Autoritetit Rrugor Shqiptar (ARRSH), bllokimi do të nisë të enjten, më 19 nëntor 2026, në orën 22:00, dhe do të zgjasë deri të premten, më 20 nëntor 2026, në orën 05:00 të mëngjesit.
Përgjatë këtyre shtatë orëve, qarkullimi në segmentin e prekur të rrugës dytësore do të ndërpritet në të dyja senset e lëvizjes.
Shkak për kufizimin është montimi i trarëve të mbikalimit të Nyjes së Laknasit, një ndërhyrje që realizohet në kuadër të fazës së tretë të projektit për zgjerimin e superstradës Tiranë-Durrës.
ARRSH sqaron se ndërprerja do të prekë rrugën dytësore në krahun e djathtë të segmentit Kamëz-Kashar, ku po realizohen punimet për ndërtimin e mbikalimit.
Në zonën e kantierit do të vendoset sinjalistikë e përkohshme për orientimin e drejtuesve të automjeteve dhe menaxhimin e trafikut gjatë orëve të bllokimit.
Autoriteti Rrugor u bën thirrje shoferëve që planifikojnë të udhëtojnë gjatë natës në këtë zonë të marrin masa paraprakisht, të planifikojnë itineraret e tyre dhe të respektojnë sinjalistikën dhe udhëzimet e punonjësve në terren.
Qarkullimi në segmentin e bllokuar parashikohet të rikthehet të premten, më 20 nëntor, në orën 05:00 të mëngjesit.















