Apple prezantoi këtë javë një model të ri iPhone Air 17. Risia e tij më e veçntë duket se nis një epokë të re. Modeli i ri nuk përmban fare kartë fizike SIM, një ndryshim i madh që mund të shënojë fillimin e fundit për një nga pjesët më të njohura dhe më të përdorura të teknologjisë së telefonisë mobile.
Modeli më i ri, iPhone Air, është telefoni i parë nga Apple që do të funksionojë vetëm me eSIM, një formë elektronike e kartës SIM që eliminon nevojën për vendosjen manuale të kartelës plastike brenda pajisjes.
Për shumë përdorues, futja e kartës SIM ka qenë një hap i detyrueshëm, shpesh i vështirë. Por me eSIM, kalimi nga një rrjet në tjetrin mund të bëhet në mënyrë dixhitale, pa pasur nevojë për karta fizike.
Ekspertët e shohin këtë hap si një pikë kthese për industrinë. Kester Mann, nga kompania kërkimore CCS Insight, tha për BBC Neës se: “Ky është fillimi i fundit për kartat fizike SIM.”
Edhe pse përdorimi i eSIM ka nisur prej disa vitesh dhe shumë telefona modernë e kanë si opsion, është hera e parë që Apple lançon një iPhone me eSIM tërësisht në nivel global. Në SHBA, kjo qasje ka nisur që prej vitit 2022, por tani për herë të parë ajo shtrihet edhe jashtë këtij tregu.
Megjithatë, Apple nuk po heq dorë plotësisht nga kartat SIM. Modelet e tjera të rej, iPhone 17, 17 Pro dhe 17 Pro Max, do të kenë versionet me eSIM tërësisht vetëm në disa tregje, ndërsa shumica e vendeve do të vazhdojnë të marrin modele me fole për SIM fizike.
Edhe prodhues të tjerë të mëdhenj si Samsung dhe Google janë duke e përqafuar teknologjinë eSIM, por njëkohësisht po ruajnë edhe opsionin tradicional për shumicën e përdoruesve.
Sidoqoftë, drejtimi është i qartë. Sipas një parashikimi nga CCS Insight, deri në fund të vitit 2024, janë përdorur 1.3 miliardë smartphone me eSIM, dhe ky numër pritet të arrijë në 3.1 miliardë deri në vitin 2030. /Skyweb.al
