Aeroporti Ndërkombëtar i Tiranës (TIA) u ka bërë thirrje pasagjerëve që të mos vendosin bateri litiumi, power bank-e apo bateri rezervë në bagazhin që dorëzohet për transport në avion.
Përmes një njoftimi publik, TIA thekson se këto pajisje duhet të mbahen gjithmonë në bagazhin e kabinës dhe të jenë lehtësisht të aksesueshme gjatë udhëtimit.
Sipas aeroportit, masa lidhet me standardet e sigurisë ajrore, pasi bateritë e litiumit paraqesin rrezik në rast mbinxehjeje ose defekti.
Për këtë arsye, ato nuk lejohen brenda bagazhit të dorëzuar, por duhet të transportohen nga pasagjerët në kabinë.
TIA u bën apel udhëtarëve që të kontrollojnë bagazhet e tyre përpara nisjes, në mënyrë që të shmangen vonesat gjatë procedurave të kontrollit dhe të garantohet një fluturim sa më i sigurt për të gjithë pasagjerët.
