Kryeministri Edi Rama ka reaguar sërish lidhur me protestat që prej ditësh po zhvillohen në Tiranë kundër qeverisë, duke deklaruar se tubimet kanë humbur lidhjen me kauzën fillestare dhe po dëmtojnë interesat e vendit.
Në një reagim të gjatë, Rama tha se qytetarët janë të lirë të protestojnë paqësisht, por argumentoi se protesta nuk lidhet më me projektet në Sazan dhe Zvërnec, pasi sipas tij dokumentacioni dhe veprimet e qeverisë tregojnë se procesi është zhvilluar në përputhje me interesin publik dhe standardet ndërkombëtare.
Kreu i qeverisë shprehu shqetësimin se protestat po ndikojnë negativisht në imazhin e Shqipërisë, turizmin dhe klimën e investimeve. Sipas tij, anulimet e rezervimeve në hotele dhe bllokimet e rrugëve rrezikojnë të kenë pasoja ekonomike për familjet dhe bizneset që varen nga industria turistike.
Rama kritikoi edhe bllokimin e rrugës së aeroportit, duke e cilësuar atë si një akt që cenon lirinë e lëvizjes së mijëra qytetarëve dhe vizitorëve. Ai tha se protesta po drejtohet nga “mendje të liga dhe duar të këqija”, ndërsa shprehu keqardhje për të rinjtë që, sipas tij, janë përfshirë në një “revolucion imagjinar”.
Një pjesë e reagimit iu kushtua edhe figurave publike që i janë bashkuar protestave. Kryeministri u shpreh se disa personazhe të njohur po e mbështesin lëvizjen me bindjen se qeveria është në vështirësi, duke i cilësuar ata si njerëz me “mendje të cekëta” që mendojnë se “deti u bë kos”.
Në përfundim, Rama deklaroi se përfituesit e vetëm të kësaj proteste do të jenë qeveria dhe Partia Socialiste. Sipas tij, qeveria do të nxjerrë mësime nga shqetësimet legjitime të protestuesve, ndërsa Partia Socialiste do të dalë më e fortë politikisht pasi të kalojë situata aktuale.
