Revista irlandeze Evoke e përshkruan Shqipërinë si destinacionin më të ri dhe më të nxehtë të pushimeve në Evropë dhe të dytin në botë pas Katarit. Vendi mesdhetar, i vendosur mes Malit të Zi në veri dhe Greqisë në jug, ofron afro 300 milje bregdet përballë Adriatikut dhe Jonit, me pamje drejt Italisë dhe Korfuzit. Dikur e izoluar nën regjimin komunist që përfundoi në vitin 1991, Shqipëria po përjeton një rilindje turistike mahnitëse.
Tirana – kryeqyteti që nuk fle
Udhëtimi ynë nisi në zemër të Tiranës, ku qëndruam në hotelin “Tirana Marriott”, i hapur në vitin 2023 – ndërtesa më e lartë dhe më moderne e qytetit, vetëm pak minuta larg Parkut të Liqenit. Zona përreth gumëzhinte nga restorantet dhe oborret e ndriçuara, perfekte për një shëtitje në mbrëmje.
Në darkë shijuam speca të kuq të pjekur, byrek me spinaq, makarona dhe një shishe verë – gjithçka për më pak se 60 euro. Kur pyetëm kamerierin për vendet që duhej të vizitonim, ai na tha pa hezitim: “Mozaikun komunist dhe Sheshin Skënderbej”.
Të nesërmen ndoqëm këshillën e tij. Sheshi Skënderbej ishte plot me njerëz, me statujën monumentale të heroit kombëtar mbi kalë që dominonte hapësirën. Në anën tjetër, fasada e Muzeut Historik Kombëtar zbukurohej nga mozaiku i famshëm “Shqipëria”, që përshkruan historinë e popullit shqiptar nga lashtësia deri në periudhën komuniste.
Brenda muzeut zbuluam objekte arkeologjike nga shekulli IV, vazo të lashta, modele fshatrash mesjetarë dhe ekspozita që rrëfenin periudha kyçe: pushtimin osman, pavarësinë e vitit 1912, Luftën e Dytë Botërore dhe vitet e regjimit komunist. Një pjesë e veçantë i kushtohej Nënë Terezës, shenjtores shqiptare me famë botërore.
Nga Tirana drejt “Maldiveve të Evropës”
Të etur për të zbuluar pse Shqipëria quhet “Maldive e Evropës”, u nisëm drejt jugut – në një udhëtim katërorësh me makinë. Së shpejti do të hapet edhe aeroporti i dytë ndërkombëtar i vendit, në Vlorë, që do ta bëjë këtë rrugëtim edhe më të lehtë.
Stacioni ynë i parë ishte Himara, dikur një fshat i vogël peshkatarësh, sot një vendpushim bregdetar që ka ruajtur qetësinë dhe autenticitetin e tij. E rrethuar nga male të buta dhe ujëra kristal, Himara të kujton Ishujt Ciklade.
Qëndruam në hotelin familjar “Rea Boutique”, hapur në vitin 1999, ku mikpritja e pronarëve – Arta dhe bashkëshorti i saj – e bënte çdo mëngjes dhe darkë të ndiheshe si në shtëpi. Dhoma jonë kishte një tarracë me pamje të mrekullueshme nga deti, dhe nata kalonte nën zhurmën e valëve.
Në vitet e fundit, Himara është bërë e njohur për vizitorë nga e gjithë Evropa dhe më gjerë – nga Spanja e Franca, deri në Britani, SHBA e Australi. Restorantet buzë detit janë plot jetë. Në “Himara 28”, shijuam levrek të freskët për 12 euro dhe verë shtëpie për vetëm 5 euro – një shije e thjeshtë, por e përsosur.
Me ujërat bruz që të ftojnë të notosh dhe temperatura që në vjeshtë arrijnë rreth 23°C, Himara është destinacioni ideal për pushime të qeta dhe buxhetore.
Ksamil – perla e Rivierës Shqiptare
Udhëtimi ynë përfundoi në Ksamil, 65 kilometra më në jug. Ky vendpushim, më i qetë se Saranda por më i gjallë se Himara, të magjeps me ujërat e detit Jon dhe ishujt e vegjël përballë. Ende pa hotele shumëkatëshe, Ksamil është në zhvillim të shpejtë, me shumë bare dhe restorante përgjatë vijës bregdetare.
Këtu ndodhet edhe një statujë simbolike – një dorë e ngritur drejt qiellit – që përshëndet vizitorët e shumtë, mes tyre edhe ndjekësit e “efektit Dua Lipa”. Këngëtarja shqiptare me famë botërore, ambasadore e pashpallur e Rivierës Shqiptare, shpesh ndan me miliona ndjekës imazhe mahnitëse nga pushimet e saj në këto plazhe.
Në Ksamil qëndruam në “Manta Resort”, një hotel modern e minimal me dhoma që shohin drejt detit dhe një verandë të madhe mbi rërë – vendi perfekt për të shijuar perëndimin e diellit.
Pamja më ktheu pas në fëmijëri, në pushimet në Korfuz, kur nga brigjet greke shihnim malet shqiptare përtej. Sot, këto male janë bërë magnet për investime të reja. Madje, Ivanka Trump dhe Jared Kushner po planifikojnë të ndërtojnë një resort luksoz në Ishullin e Sazanit, me një investim prej 855 milionë eurosh.
Një vend që rilindi nga hija e historisë
Ditët e errëta të komunizmit i përkasin së kaluarës. Shqipëria e sotme është një destinacion i ri, i gjallë dhe plot jetë – një Maldive e re Evropiane që pret të zbulohet. /Skyweb.al
