Bashkimi Evropian do të ndërmarrë hapa për të kufizuar qasjen e fëmijëve të vegjël në rrjetet sociale në të 27 vendet anëtare, tha të hënën Presidentja e Komisionit Evropian, Ursula von der Leyen. Kjo do të ishte nisma më e madhe deri më sot për t’i mbrojtur fëmijët nga rreziqet në internet, sipas Reuters.
Von der Leyen prezantoi një dokument të hartuar nga dy ekspertë, i cili rekomandon një qasje të shkallëzuar. Sipas propozimit, fëmijët nën moshën 13 vjeç do të lejohen të përdorin rrjetet sociale vetëm për periudha të kufizuara kohore dhe nën mbikëqyrjen e prindërve, kujdestarëve ose mësuesve. Kufizimet do të hiqen gradualisht ndërsa adoleshentët rriten në moshë.
“Është e qartë se kemi nevojë për kufizime të përshtatshme sipas moshës për platformat,” u tha Von der Leyen gazetarëve në Bruksel.
“Pyetja nuk është më nëse fëmijët përballen me rreziqe në internet, por çfarë mund të bëjmë për t’u dhënë atyre një fillim më të sigurt në botën digjitale,” shtoi ajo.
Von der Leyen la të kuptohet se ka shumë gjasa të ndjekë rekomandimet e ekspertëve dhe se Komisioni Evropian do të paraqesë një propozim konkret pas verës. Ajo pritet ta shpallë atë gjatë fjalimit të saj për Gjendjen e Bashkimit Evropian në muajin shtator.
Australia, Britania e Madhe, Kina, India dhe Shtetet e Bashkuara kanë vendosur tashmë ndalime për përdorimin e rrjeteve sociale nga të miturit ose po shqyrtojnë masa të tilla. Këto masa do të preknin kryesisht platformat TikTok, YouTube (në pronësi të Alphabet) dhe Instagram e Facebook (në pronësi të Meta).
