Më 15 tetor 2015, qeveria me kryeministër po Edi Ramën, prezantonte portalin Transparenca.al, i cili do t’u ofronte qytetarëve versionin e qeverisë përballë akuzave të opozitës dhe raportimeve të mediave.
Për disa vite, portali u përdor pikërisht për këtë qëllim: Të kthente përgjigje ndaj lajmeve, denoncimeve dhe akuzave politike, duke paraqitur këndvështrimin zyrtar të qeverisë mbi atë që konsideronte të pavërtetë apo të deformuar.
Më shumë se një dekadë më vonë, Rama rikthehet te e njëjta ide, këtë herë me një emër të ri: “Pasqyr Albania”.
Në thelb, projekti i prezantuar sot ngjan me një “Transparenca.al 2.0”, por më të zgjeruar, ku qeveria synon t’u japë qytetarëve jo vetëm versionin e saj të ngjarjeve, por edhe dokumentet, procesverbalet, vendimet dhe arsyetimet që qëndrojnë pas tyre….sipas këndvështrimit të qeverisë.
Gjatë 12 viteve e kusur në pushtet, Rama përmes diskursit të tij ka treguar se mendon se problemi nuk qëndron te realiteti, por se si ai perceptohet dhe interpretohet nga publiku.
Gjatë takimit të sotëm me ministrat dhe deputetët, Rama tha se portalet institucionale të sotme janë thjesht “rafte” ku hidhet informacion, ndërsa platforma e re do të funksionojë si një kontratë mes qytetarit dhe shtetit.
Sipas tij, aty do të mund të gjenden dokumentet, procesverbalet, mendimet e ekspertëve, arsyet e vonesave, baza ligjore dhe personat përgjegjës për çdo proces.
Kryeministri argumentoi se qytetarët sot mund të bien lehtësisht pre e dezinformimit, pikërisht sepse nuk kanë një burim të vetëm ku të kontrollojnë versionin zyrtar të fakteve.
Me “Pasqyra Albania”, qeveria synon që qytetari të mos mbështetet më te komunikatat apo informacionet e shpërndara, por të ketë akses te dokumentacioni që, sipas ekzekutivit, tregon se çfarë ka ndodhur realisht. /skyweb.al
