Ndërtimi në vend po tregon shenja të forta ngadalësimi. Sipas të dhënave të publikuara nga INSTAT për tremujorin e dytë të vitit 2025, sipërfaqja totale e parashikuar për ndërtimet e reja arriti në 278.389 m², duke shënuar një ulje drastike prej 67 % krahasuar me të njëjtën periudhë të vitit 2024, kur u miratuan rreth 844.137 m².
Në total, gjatë periudhës prill–qershor 2025 u miratuan 352 leje ndërtimi për ndërtesa të reja, nga 354 që ishin një vit më parë. Megjithëse numri i lejeve mbeti thuajse i pandryshuar, vlera e përafërt e projekteve të miratuara (që përfshin si ndërtesat ashtu edhe punimet inxhinierike) ra ndjeshëm, duke zbritur në 18,4 miliardë lekë, nga 33,7 miliardë lekë në të njëjtën periudhë të vitit të kaluar.
Ndërtimet për banim përbëjnë pjesën më të madhe të lejeve të reja, me 271 leje dhe një sipërfaqe ndërtimi prej 119.051 m², ndërsa ndërtesat jo-rezidente – si hotele, qendra tregtare dhe ndërtesa industriale – përfaqësojnë pjesën tjetër, me 81 leje dhe një sipërfaqe prej 159.338 m².
Sa i përket shpërndarjes gjeografike, Qarku i Durrësit kryeson listën me 156 leje ndërtimi dhe një sipërfaqe ndërtimi prej 129.617 m², duke treguar se ky rajon mban peshën kryesore të zhvillimit ndërtimor.
Rritje të vlerës së projekteve ndërtimore janë regjistruar edhe në qarqet Korçë dhe Shkodër.
