Prodhimi i energjisë nga burimet e tjera të rinovueshme, ku përfshihen edhe fotovoltaikët, ka shënuar rritje të fortë në tremujorin e parë të vitit 2026.
Sipas të dhënave të INSTAT për bilancin e energjisë elektrike, kategoria “të tjerë prodhues”, që përjashton energjinë hidro dhe termo dhe përfshin burime si fotovoltaikët, prodhoi 254 GWh energji në tremujorin e parë 2026, nga 176 GWh në të njëjtën periudhë të vitit 2025. Kjo përfaqëson një rritje prej 44%.
Rritja tregon se impiantet fotovoltaike dhe burimet alternative po marrin gradualisht më shumë peshë në sistemin energjetik të vendit.
Megjithatë, ndikimi i tyre mbetet ende i kufizuar në raport me prodhimin total vendas.
Në tremujorin e parë 2026, prodhimi neto vendas i energjisë elektrike arriti në 3,647 GWh, me rritje 63.2% krahasuar me një vit më parë.
Nga ky total, hidrocentralet publike siguruan 45.7%, hidrocentralet private dhe koncesionare 47.3%, ndërsa prodhuesit e tjerë, ku hyjnë edhe fotovoltaikët, vetëm 7%.
Kjo do të thotë se, pavarësisht rritjes së shpejtë të fotovoltaikëve, Shqipëria vazhdon të mbetet thellësisht e varur nga hidrocentralet. Në total, prodhimi nga hidrocentralet arriti në 3,393 GWh, duke dominuar thuajse të gjithë prodhimin vendas.
Rritja e prodhimit nga burimet alternative është e rëndësishme për diversifikimin e energjisë, sidomos në një vend ku prodhimi varet shumë nga reshjet dhe prurjet hidrike. Por të dhënat tregojnë se fotovoltaikët janë ende në fazë zgjerimi dhe nuk kanë arritur të ndryshojnë strukturën kryesore të prodhimit.
Në terma absolutë, prodhuesit e tjerë shtuan rreth 78 GWh më shumë energji krahasuar me tremujorin e parë të vitit të kaluar. Kjo është një rritje e dukshme, por ende e vogël krahasuar me prodhimin e hidrocentraleve.
Të dhënat e INSTAT tregojnë se energjia diellore po rritet, por sfida kryesore mbetet rritja e peshës së saj në bilancin kombëtar. Për momentin, fotovoltaikët po kontribuojnë më shumë se më parë, por sistemi energjetik shqiptar vazhdon të mbahet kryesisht nga hidrocentralet. /skyweb.al
