Behgjet Pacolli ka reaguar sërish në rrjetet sociale, në një moment kur vijon përplasja mes kompanisë MABCO dhe 2A Group të Valon Ademit për projektin e Aeroportit të Vlorës.
Reagimi vjen pasi MABCO i ka dërguar institucioneve shqiptare një letër ku kërkon ndërhyrje për situatën në kantier dhe paralajmëron arbitrazh ndërkombëtar nëse nuk merren masa deri më 28 maj 2026.
Në postimin e tij, Pacolli nuk përmend me emër Valon Ademin apo kompaninë 2A Group, por përdor një fabul me një mizë dhe një buall.
Behgjet Pacolli, ultimatum Ramës: Ke kohë deri më datë 28 maj
“Para se ta publikoj tekstin në vijim, dua nga zemra t’i falënderoj njerëzit e mirë dhe miqtë e mi që më besojnë, kudo që janë. Mirënjohja ime për ju dhe ata është e sinqertë dhe e përhershme”, shkruan Pacolli.
Më pas ai rrëfen historinë e një mize që qëndronte mbi shpinën e një bualli të madh, ndërsa bualli “ecte ngadalë, i qetë, punonte tokën, mbante barrë, kalonte lumenj e stuhi, pa bërë zhurmë”.
Sipas fabulës së Pacollit, miza i qëndronte te veshi buallit dhe e provokonte duke i thënë: “Pse nuk flet? Pse nuk nervozohesh? Apo mos ke frikë prej meje?”
Pacolli vijon se, sa më shumë heshtte bualli, aq më shumë miza mendonte se ishte “dikushi”. Në fund, pasi miza i thotë buallit se e kishte ndalur dhe e kishte detyruar të merrej me të, bualli i përgjigjet: “Jo. Ti vetëm po e ngatërron durimin tim me zhurmën tënde”.
Postimi i Pacollit vjen në kulmin e konfliktit për Aeroportin e Vlorës, ku palët kanë shkëmbyer akuza publike për kontrollin e projektit dhe situatën në kantier.
MABCO pretendon se është përjashtuar nga kantieri dhe kërkon ndërhyrjen e shtetit shqiptar. Nga ana tjetër, Valon Ademi ka reaguar më herët me akuza të forta ndaj Pacollit, duke e lidhur përplasjen me kontrollin e aeroportit.
Aeroporti i Vlorës mbetet ende në qendër të konfliktit mes palëve, ndërsa MABCO ka vendosur afatin 28 maj 2026 për zgjidhjen e situatës përpara se të ndjekë rrugën e arbitrazhit ndërkombëtar. /skyweb.al
