“Prada”, shtëpia e njohur italiane e modës e themeluar në vitin 1913 në Milano nga Mario Prada, ka konfirmuar zyrtarisht blerjen e rivalit të saj, “Versace”.
Marrëveshja, e cila më herët ishte vlerësuar rreth 1,25 miliardë euro, është finalizuar pasi “Prada” bleu të gjitha aksionet e “Versace” që ishin në pronësi të kompanisë amerikane të modës luksoze “Capri Holdings”. Transaksioni u bë i mundur vetëm pasi mori të gjitha miratimet rregullatore të nevojshme.
Komisioni Evropian e dha miratimin e tij në shtator, duke hapur rrugën për bashkimin e dy ikonave të modës italiane. Çmimi i blerjes mbetet nën 1,5 miliardë euro.
“Prada”, e cila zotëron gjithashtu markat “Miu Miu” dhe “Church’s”, kishte njoftuar planet për këtë blerje në prill, pas muajsh spekulimesh në tregun e modës. Sipas gazetës “Corriere della Sera”, procesi nuk ka qenë i lehtë dhe janë kapërcyer disa pengesa përpara finalizimit të marrëveshjes. Ndër shqetësimet kryesore ishin edhe tarifat ndëshkuese të vendosura nga administrata e atëhershme amerikane e presidentit Donald Trump ndaj vendeve të tjera, përfshirë Italinë.
“Prada” dhe “Versace” konsiderohen prej vitesh ndër markat më prestigjioze italiane. “Versace”, e themeluar në vitin 1978, mbetet një emër i lidhur ngushtë me themeluesin e saj Gianni Versace, i cili u vra në SHBA në vitin 1997.
Në mars, Donatella Versace, e cila kishte drejtuar shtëpinë e modës për gati tre dekada, u largua nga pozita e drejtoreshës kreative. Ajo u zëvendësua nga Dario Vitale, ish-dizajner i “Miu Miu”.
