Tregu britanik i pasurive të paluajtshme po përjeton periudhën më të vështirë që prej vitit 2018, me gjithnjë e më shumë prona që po shiten për më pak sesa janë blerë fillimisht, sipas të dhënave të Hamptons të publikuara nga Financial Times.
Ekspertët theksojnë se për herë të parë në një dekadë është bërë jetike që çmimi i listimit të përcaktohet me saktësi.
Shtëpitë që kanë pësuar ulje çmimi qëndrojnë mesatarisht 64 ditë më gjatë në treg përpara se të shiten, diferenca më e madhe që prej vitit 2015. Madje, sipas analistit kryesor të Hamptons, David Fell, pikërisht këto janë pronat që në shumicën e rasteve nuk arrijnë të shiten fare.
Pavarësisht kësaj, vlerësuesit profesionistë pohojnë se përcaktimi i çmimit real të një prone është sot më i lehtë sesa ka qenë që prej krizës financiare të vitit 2008, falë transparencës më të madhe të tregut dhe aksesit në të dhëna.
Megjithatë, shumë pronarë në Mbretërinë e Bashkuar vazhdojnë të listojnë shtëpitë e tyre me çmime më të larta nga sa vlejnë realisht — ose të paktën më shumë sesa blerësit janë të gatshëm të paguajnë.
Kjo shkëputje midis perceptimit dhe realitetit po shpjegohet si një “vetëbesim i tepruar” i pronarëve përballë një tregu që është ngadalësuar ndjeshëm, ndërsa normat e interesit të larta dhe inflacioni kanë frenuar fuqinë blerëse të familjeve britanike.
Një fenomen i ngjashëm po vërehet edhe në Shqipëri, ku shumë pronarë, të nxitur shpesh nga agjencitë imobiliare, i nxjerrin banesat në shitje me çmime që nuk pasqyrojnë realitetin e tregut.
Por tendenca po ftohet ndjeshëm, ndërsa aktorët kryesorë të tregut po përgatiten për ndryshime të rëndësishme që pritet të ndodhin gjatë vitit 2026 e në vijim./skyweb.al
