Dikur simbolet e statusit për të pasurit identifikoheshin me çanta luksoze, makina sportive apo orë të shtrenjta.
Por sipas një analize të Financial Times, në vitin 2025 po shfaqet një trend i ri në vendet e zhvilluara: të kesh një familje të madhe është kthyer në shenjën më të qartë të pasurisë dhe prestigjit shoqëror.
Me rritjen e kostove të jetesës, pasigurinë ekonomike globale dhe tkurrjen e madhësisë së familjeve, prindërimi me shumë fëmijë është bërë për shumicën një barrë e papërballueshme.
Nga arsimi privat, te kujdesi shëndetësor dhe kostot e përditshme, shpenzimet janë të larta dhe vetëm shtresat e pasura mund t’i përballojnë.
Pikërisht kjo e ka kthyer familjen e madhe në një “luks” të kohëve moderne.
Në shoqëritë perëndimore, ndërsa dikur një Ferrari apo një çantë “Hermès” ishin tregues prestigji, sot është fakti që një çift mund të përballojë rritjen e katër, pesë apo edhe më shumë fëmijëve.
Ky fenomen po shfaqet veçanërisht në SHBA dhe Evropë, ku të pasurit e përdorin si mënyrë për t’u dalluar nga pjesa tjetër e shoqërisë.
Sipas sociologëve, ky zhvillim reflekton jo vetëm ndryshimin e simboleve të statusit, por edhe thellimin e ndarjes sociale.
Të kesh një familje të madhe, dikur një pjesë e natyrshme e jetës, sot është kthyer në shenjë privilegji për ata që kanë burime financiare të bollshme./skyweb.al
