Qindra supermarkete në Francë janë prekur nga një sulm i gjerë kibernetik, gjatë të cilit hakerët dyshohet se kanë rritur temperaturën e frigoriferëve dhe ngrirësve deri në 50 gradë Celsius, duke shkaktuar humbje të konsiderueshme të produkteve ushqimore dhe zjarre.
Sipas Prokurorisë së Parisit, sulmi në shkallë të gjerë ka prekur frigoriferët e lidhur me internetin në disa prej rrjeteve më të mëdha të shitjes së ushqimeve në vend.
Ngjarjet janë regjistruar gjatë natës, kur sistemet e ftohjes dyshohet se janë manipuluar nga distanca. Rritja ekstreme e temperaturës ka bërë që sasi të mëdha ushqimesh të prishen, ndërsa në disa raste janë raportuar edhe zjarre.
Kryeministri francez, Sébastien Lecornu, ka urdhëruar Agjencinë Kombëtare të Sigurisë Kibernetike të Francës (ANSSI) të nisë hetimet për zbardhjen e sulmit dhe identifikimin e përgjegjësve.
Autoritetet po shqyrtojnë mënyrën se si janë komprometuar sistemet e frigoriferëve të lidhur në rrjet dhe nëse sulmi ka përfshirë dobësi të sigurisë në pajisjet e menaxhimit nga distanca.
Hetimet vijojnë, ndërsa ngjarja ngre shqetësime për sigurinë e sistemeve inteligjente që përdoren në zinxhirët ushqimorë dhe për rreziqet që sulmet kibernetike mund të paraqesin për furnizimin me produkte ushqimore. /skyweb.al
