Bastet e paligjshme dhe Call Center-at mashtrues kanë nisur të rihapen pjesërisht, por pa një marrëveshje për kontrollin e tregut. Burime të Skyweb.al bëjnë me dije se operatorë në Tiranë dhe rrethe po rifillojnë aktivitetin duke marrë vetë përsipër rrezikun, ndërsa mes grupeve kanë nisur fërkimet për territoret.
Sipas këtyre burimeve, në lojë është futur një aktor i fuqishëm, i cili ka marrë së fundmi drejtimin e një dikasteri të rendësishëm. Burimet e lidhin pezullimin e aktivitetit me ndërhyrjen e këtij personazhi, duke pretenduar se ai kërkon pjesën e tij në treg ose kontrollin e të gjithë “tortës”.
Skyweb.al raportoi më 2 tetor se aktiviteti i basteve dhe Call Center-ave ilegalë ishte ndalur prej gati dhjetë ditësh, ndërsa shkëmbimet e mëdha të kriptomonedhave kishin rënë ndjeshëm. Lokalet qëndronin të mbyllura ose hapeshin për pak orë, ndërsa punonjësit e Call Center-ave ishin dërguar përkohësisht në shtëpi.
Burimet përshkruanin këtë një pezullim të përkohshëm deri në qartësimin e marrëdhënieve mes aktorëve që kontrollojnë këto veprimtari. Mesazhi për organizatorët, ishte: “Nuk keni më mbrojtje! Stop këto ditë, deri sa të qartësohet situata!”
Por zgjatja e bllokimit ka shtuar pakënaqësitë. Operatorë lokalë pretendohet se kanë paguar për mbrojtjen që tashmë nuk po u sigurohet dhe po kërkojnë zgjidhje individuale sipas zonave e rretheve. Sipas burimeve, kjo po e çon tregun drejt një decentralizimi të detyruar, ku secili vepron “me kokën e tij”.
Kontrolli i deritanishëm, sipas të njëjtave burime, lidhet me një personazh të njohur, i cili ka mbyllur “hallet” me SPA-un dhe tani ka dorë të lirë në terren. Por, ndryshimet në qeveri gjatë muajve të fundit duket se kanë prishur “status quo-në” në treg.
Skyweb.al nuk ka arritur ende të mësojë nëse aktori i ri ka marrë kontrollin apo nëse po negociohet një “deal” me grupin që mban status quo-në. Ndërkohë, burimet raportojnë se mungesa e një figure që imponon rregullat nga lart po bën që grupet të hyjnë në territoret e njëri-tjetrit.
“Kjo mund të sjellë konflikte të forta mes grupeve, por duhet parë çfarë do të ndodhë në vijim, nëse do të ruhet centralizimi apo do të vazhdojë ky decentralizim i detyruar. Secili po bën sipas kokës së vet tani”, tha një burim pranë zhvillimeve, duke shtuar se tregu nuk është hapur ende tërësisht.
Në fund të shtatorit, katër persona u ndaluan në një Call Center në Rrugën e Kavajës, i dyshuar për mashtrimin e qytetarëve europianë. Në Has është goditur gjithashtu një lokal ku u sekuestruan dhjetë makineri elektronike dhe një tavolinë pokeri.
Burimet nga tregu i interpretojnë këto ndërhyrje si pjesë të përplasjes për kontrollin e ilegalitetit, i cili qarkullon qindra miliona euro në vit.
“Operacionet e fundit nuk duhen ngatërruar thjesht me zbatimin e ligjit. Thjesht dikush atje sipër po kërkon copën e tij ose të gjithë tortën. Kjo do të shihet në vijim”, vijoi burimi. /skyweb.al
