Kryeministri Edi Rama ka reaguar sërish për çështjen e Zvërnecit. Në rrjetet sociale, kreu i qeverisë thekson se institucionet europiane janë informuar në detaje mbi procedurat administrative që lidhen me projektin në Sazan dhe Zvërnec dhe sipas Ramës këtë mesazh e përcolli fare mirë Marta Kos.
“Komisioni Europian është njohur në detaje me procesin e dokumentuar administrativ lidhur me Sazanin e Zvërnecin dhe vetë Komisionerja Marta Kos ka folur qartë për të gjithë ata që duan t’i referohen fakteve”, shkruan Rama.
Komisionerja për Zgjerimin, Marta Kos, një ditë më parë u shpreh se Shqipëria ka dhënë garanci se për projektin e Zvërnecit do të kryhet një vlerësim i plotë i ndikimit në mjedis.
Ndërkohë, në Tiranë vijojnë protesta që nisën fillimisht për të kundësrshtuar projektin, ndërsa kërkesat e qytetarëve janë zgjeruar, duke kërkuar dorëheqjen e kryeministrit. /skyweb.al
