Pas protestave dhe kundërshtimeve për projektin e parashikuar në Zvërnec, kryeministri Edi Rama ka sjellë si shembull modelin e Costa Navarinos në Greqi, një prej destinacioneve më të njohura turistike në Mesdhe.
Në një postim të publikuar këtë mëngjes, Rama e paraqiti Costa Navarinon si një histori suksesi, duke e lidhur me debatin që po zhvillohet në Shqipëri për projektin në Zvërnec. Ai iu referua këtij shembulli edhe një ditë më parë, gjatë mbledhjes së grupit parlamentar të Partisë Socialiste, ku tha se edhe Costa Navarino ishte kundërshtuar fort në fillim, pasi ndodhej në një zonë me ndjeshmëri mjedisore, por sot konsiderohet krenari e turizmit grek.
Sipas Ramës, para ndërtimit të projektit në Messinia të Greqisë, pati protesta, peticione, debate dhe parashikime për shkatërrim të natyrës, zhdukje të biodiversitetit dhe dëmtim të peizazhit. Ai e krahasoi këtë klimë kundërshtimi me debatet që po zhvillohen ditët e fundit në Shqipëri për Zvërnecin.
Kryeministri shkruan se, pavarësisht kundërshtive fillestare, Costa Navarino sot është kthyer në një nga destinacionet më prestigjioze të Europës, duke gjeneruar miliarda euro për ekonominë, mijëra vende pune dhe rritje të bizneseve lokale përreth.
Rama thekson se projekti grek, sipas tij, ka arritur të ruajë ekuilibrin mes natyrës dhe zhvillimit, duke përmendur disa tregues mjedisorë, si 75% më pak emetime operacionale karboni krahasuar me vitin 2019, mbi 185 mijë metra kub ujë të ricikluar dhe ripërdorur gjatë vitit 2024, 72% më pak plastikë njëpërdorimëshe dhe përdorim 100% të energjisë elektrike nga burime të rinovueshme.
Megjithatë, kryeministri pranon se jo çdo investim i madh është automatikisht i mirë dhe se jo çdo shqetësim duhet shpërfillur. Sipas tij, çështja është që zhvillimi të mos mohohet kategorikisht dhe që projektet të mos paragjykohen pa u vlerësuar më parë.
“Po të ishte dëgjuar gjithmonë kori i atyre që thonë ‘nuk bëhet’ se prishet, njerëzimi do të ishte ende duke diskutuar nëse ia vlen të shpiket rrota”, shkruan Rama.
Në fund të postimit, kryeministri ngre të njëjtën pyetje që artikuloi edhe një ditë më parë: nëse Shqipëria mund të ketë një projekt të ngjashëm me Costa Navarinon.
Sipas tij, kjo mund të ndodhë në Zvërnec, madje në një formë edhe më të dukshme ndërkombëtarisht. Rama shkruan se projekti ka ambicien të krijojë “destinacionin më tërheqës të kësaj ane të Mesdheut”, ndërsa debati për mënyrën se si do të realizohet mbetet i lidhur me projektin konkret dhe jo vetëm me shembullin grek që ai solli në vëmendje.
