Numri i konsumatorëve që prodhojnë vetë energji elektrike po rritet nga viti në vit në Shqipëri, por të dhënat tregojnë se pjesa dërrmuese e tyre janë biznese.
Sipas të dhënave të Entit Rregullator të Energjisë, deri në fund të vitit 2025, numri total i konsumatorëve me statusin e vetëprodhuesit arriti në 3,551.
Nga këta, 68% janë konsumatorë jofamiljarë, pra kryesisht biznese që kanë instaluar kapacitete prodhuese, kryesisht përmes paneleve fotovoltaike, për të mbuluar një pjesë të konsumit të tyre të energjisë.
Në vend të dytë renditen konsumatorët familjarë, me 1,089 vetëprodhues, që përfaqësojnë rreth 30% të totalit. Ndërkohë, institucionet publike numërojnë 69 vetëprodhues, ndërsa institucionet jobuxhetore vetëm 16.
Numri i vetëprodhuesve pritet të rritet më tej pas miratimit të skemës së re të kompensimit për energjinë e prodhuar nga panelet fotovoltaike, raporton TVScan.
Me vendimin e ri, sistemi kalon nga modeli i “matjes neto” në atë të “faturimit neto”. Në praktikë, energjia e tepërt që hidhet në rrjet nuk do të kompensohet më në kilovat/orë, por në vlerë monetare.
Kjo do të thotë se energjia e injektuar në rrjet do të blihet nga furnizuesi, ndërsa vlera përkatëse do të kreditohet në faturën e konsumatorit për muajin pasardhës.
Skema do të zbatohet për konsumatorët familjarë dhe jofamiljarë me kapacitet të instaluar deri në 500 kWp.
Çmimi i energjisë së injektuar do të bazohet në çmimin mesatar të energjisë në bursën ALPEX gjatë vitit paraardhës, duke përfshirë edhe kostot e rrjetit dhe të balancimit.
Megjithatë, vendimi parashikon një garanci minimale për konsumatorët familjarë. Çmimi i energjisë së injektuar nuk mund të jetë më i ulët se 80% e tarifës së energjisë që paguajnë familjet.
Në këtë mënyrë, skema synon të krijojë një mekanizëm më të qartë financiar për vetëprodhuesit, duke e lidhur kompensimin me çmimet reale të tregut, por pa e lënë plotësisht të ekspozuar konsumatorin familjar ndaj luhatjeve të bursës.
