Policia e Delhit ka goditur një skemë mashtrimi që u premtonte të rinjve vende pune në aeroport përmes një kompanie ajrore të rreme të quajtur “Bretish Airways”.
Gjashtë persona janë ndaluar, mes tyre organizatori i dyshuar, bashkëpunëtori i tij, një zhvillues faqesh interneti dhe tri gra që prezantoheshin si punonjëse të burimeve njerëzore.
Mashtruesit publikonin reklama në Instagram dhe kontaktonin aplikantët, duke u kërkuar dokumentet personale, CV-në dhe dëftesat përmes WhatsApp-it. Më pas u thoshin se, për t’u punësuar në Aeroportin Ndërkombëtar Indira Gandhi, duhej të kryenin një kurs të detyrueshëm pranë institutit të rremë “Future Wings Learning Institute”.
Kandidatëve u kërkoheshin nga 7 mijë deri në 10 mijë rupi, rreth 70–100 euro, si tarifë regjistrimi. Pas pagesës, ata merrnin mandat regjistrimi, certifikata dhe oferta pune të falsifikuara.
Hetimi nisi pas denoncimit të një aplikanti, i cili pagoi 7 mijë rupi dhe më pas zbuloi se “Bretish Airways” nuk ekzistonte. Numrat e përdorur nga të dyshuarit ndërkohë kishin dalë jashtë funksionit.
Sipas policisë, grupi blinte të dhënat e punëkërkuesve nga portalet e punësimit dhe vepronte nga një zyrë me qira në Noida. Kur shtoheshin ankesat, të dyshuarit ndryshonin emrin e kompanisë, faqet e internetit, zyrat, kartat SIM dhe telefonat.
Gjatë operacionit u sekuestruan dy laptopë, tetë telefona, tetë karta SIM dhe dy regjistra me të dhënat e aplikantëve. Autoritetet kanë identifikuar të paktën 10 ankesa të lidhura me skemën, por dyshojnë se numri i viktimave mund të jetë më i madh.
Policia u ka bërë thirrje qytetarëve që t’i verifikojnë ofertat e punës vetëm përmes kanaleve zyrtare dhe të mos paguajnë kurse apo tarifa të paraqitura si kusht për punësim.
