Disa njerëz jetojnë disa dekada më gjatë se të tjerët, madje edhe përtej moshës 100 vjeç. Çfarë i bën ata të ndryshëm? Studiuesit në Universitetin e Osakës në Japoni kanë zbuluar një karakteristikë të përbashkët te njerëzit që jetojnë mbi 100 vjeç: një numër jashtëzakonisht të lartë të një lloji specifik dhe të rrallë qelizash.
CD4 CTL-të, qeliza të bardha të gjakut që janë pjesë e përgjigjes imunitare të trupit shtohen ndjeshëm ndërsa njerëzit arrijnë moshën 100 vjeç, sipas këtij studimi.
Në studimin e publikuar në revistën Cell Reports, studiuesit zbuluan se këto qeliza shtohen dhe përshtaten te njerëzit shumë të moshuar. Ndërsa te individët më të rinj ato zakonisht përbëjnë më pak se 5% të qelizave T, te superqindvjeçarët njerëzit 110 vjeç e lart, përqindja mesatare arrin rreth 17.6%.
Studiuesit analizuan mostrat e gjakut të 28 të rriturve, të ndarë në tre grupe sipas moshës: 70–99 vjeç, 100–109 vjeç dhe 110 vjeç e lart. Ata zbuluan se përqindja e CD4 CTL-ve rritej bashkë me moshën: përkatësisht 4%, 9.6% dhe 17.6%.
Plakja vjen si pasojë e grumbullimit të dëmtimeve molekulare dhe qelizore me kalimin e kohës, duke shkaktuar një rënie graduale të aftësive fizike dhe mendore, si dhe një rritje të rrezikut për sëmundje dhe vdekje.
Megjithatë, autorët theksuan se plakja nuk është vetë një sëmundje dhe nuk çon domosdoshmërisht në dështimin e sistemeve jetësore të organizmit.
Superqindvjeçarët konsiderohen një model i plakjes së shëndetshme, pasi ata ruajnë sisteme imunitare, kardiovaskulare dhe profile epigjenomike që duken më të “reja” nga sa do të pritej për moshën e tyre. Kjo u mundëson të jetojnë gjatë duke shmangur ose vonuar sëmundje të mëdha të lidhura me moshën, si sëmundjet kardiovaskulare dhe kanceri.
“CD4 CTL-të janë një popullatë atipike dhe relativisht e rrallë e qelizave T”, tha autori kryesor i studimit, Kosuke Hashimoto, profesor i asociuar në Universitetin e Osakës. Sipas tij, rritja e madhe e këtyre qelizave te superqindvjeçarët mund të japë të dhëna të rëndësishme se si sistemi imunitar arrin të ruhet edhe në moshë tepër të avancuar.
“Zgjerimi selektiv i disa llojeve të qelizave T sugjeron se, edhe në moshë shumë të madhe, sistemi imunitar mund të vazhdojë të përshtatet ndaj sfidave që lidhen me plakjen.”
Studimi sugjeron se këto qeliza mund të kontribuojnë në plakjen e shëndetshme dhe jetëgjatësinë, duke sulmuar qelizat e plakura që grumbullohen në organizëm dhe duke ndihmuar sistemin imunitar të zbulojë e të luftojë tumoret.
Megjithatë, autorët theksuan se kërkimi, i cili u përqendrua te prania e qelizave T që qarkullojnë në gjak, nuk provon se një numër i madh i CD4 CTL-ve parandalon kancerin ose bën që një person të jetojë më gjatë.
Hapi i ardhshëm për ekipin e Hashimotos është të studiojë se si sillen këto qeliza brenda indeve të trupit të njeriut.
Me pak fjalë: njerëzit që arrijnë 110+ vjeç duket se kanë një sistem imunitar shumë të veçantë. Një nga karakteristikat është prania e një sasie shumë më të madhe të qelizave CD4 CTL. Shkencëtarët mendojnë se ato mund të ndihmojnë trupin të kontrollojë qelizat e dëmtuara dhe tumoret, por ende nuk është provuar se këto qeliza janë shkaku i jetëgjatësisë. /skyweb.al
