Administrata Tatimore ka publikuar listën e pagave indikative për sektorin mjekësor dhe atë të kujdesit personal, një mekanizëm që do të përdoret për të identifikuar rastet e dyshuara të mosdeklarimit të pagave reale.
Sipas kësaj liste, pagat referencë në sektorin shëndetësor arrijnë nivele të larta për profesionet më të specializuara. Kirurgët e specializuar (neuro, kardio, ortopedi, plastike) dhe anestezistët kanë një pagë indikative prej 215 mijë lekësh, ndërsa kirurgët e përgjithshëm dhe specialistë si kardiologët apo neurologët janë në nivelin e 200 mijë lekëve.
Mjekët pediatër dhe gjinekologë janë vendosur në rreth 210 mijë lekë, ndërsa mjekët e përgjithshëm në 163 mijë lekë dhe mjekët e familjes në 165 mijë lekë. Për stomatologët paga indikative është 110 mijë lekë, ndërsa për dentistët e specializuar rreth 105 mijë lekë.
Në nivelet më të ulëta të këtij sektori, infermierët e përgjithshëm kanë një pagë referencë prej 100 mijë lekësh, kryeinfermierët 125 mijë lekë, ndërsa asistentët mjekësorë dhe dentarë rreth 85 mijë lekë. Laborantët mjekësorë janë në nivelin e 100 mijë lekëve, ndërsa teknikët e laboratorëve dentarë në rreth 80 mijë lekë.
Ndërkohë, në sektorin e kujdesit personal, lista përfshin edhe profesione që deri më tani nuk ishin në fokus të këtij mekanizmi. Berberët dhe parukierët kanë një pagë indikative prej 75 mijë lekësh, estetistët dhe kozmetistët 80 mijë lekë, ndërsa manikyristet, pedikyristet dhe trajnerët e palestrës gjithashtu në nivelin e 80 mijë lekëve. Instruktorët personalë janë vendosur më lart, me një pagë referencë prej 120 mijë lekësh.
Administrata Tatimore sqaron se këto nivele nuk janë detyrim ligjor për pagesë, por do të përdoren si bazë krahasimi për analizën e riskut.
“Tatimpaguesit që deklarojnë paga nën nivelin e pagave indikative për profesionet përkatëse, apo që ndryshojnë kategorizimin e profesionit të punonjësit me qëllim deklarimin e një page më të ulët, do të konsiderohen me risk dhe do të jenë objekt verifikimi nga strukturat e specializuara të Administratës Tatimore,” thuhet në njoftimin zyrtar.
Administrata u bën thirrje bizneseve të deklarojnë saktë pagat reale, duke theksuar se kjo masë synon rritjen e kontributeve dhe garantimin e pensioneve më të qëndrueshme për punonjësit në këto sektorë.
